សត្វតោភ័យស្លន់ស្លោមួយក្បាលនេះត្រូវបានថតជាប់នៅក្នុងកាមេរ៉ាអ្នកទេសចរឥណ្ឌាម្នាក់នៅប្រទេសកេនយ៉ា ពេលវាកំពុងលាក់ខ្លួននៅលើដើមឈើ ដើម្បីរត់គេចចេញពីហ្វូងក្របីខឹងសម្បារជាង១០០ក្បាល។សត្វតោមួយក្បាលនេះ បានឡើងលើដើមអាកាស្យា ក្រោយពីត្រូវបានហ្វូងក្របីប្រហែលជាង១០០ក្បាលដេញវ័ដ្ត នៅក្នុងឧទ្យានជាតិ Lake Nakuru ប្រទេសកេនយ៉ា។ សត្វតោបាក់ស្បាតមួយក្បាលនេះ បានត្រឹមតែគ្រហឹមដាក់ហ្វូងក្របី ពីលើដើមឈើ ប៉ុន្តែក្រោយមកវាក៏បានរអិលធ្លាក់ពីលើមែកឈើដោយសារតែទម្ងន់របស់វា។
ថ្វីត្បិតតែតោមួយក្បាលនេះ មិនអាចឡើងទៅខ្ពស់យ៉ាងណាក្តី នៅទីបញ្ចប់ហ្វូងក្របីទាំងនេះ បានអស់អារម្មណ៍នឹងតាមវ័ដ្តវា ហើយក៏បានដើរចេញទៅអស់ ទុកឲ្យសត្វតោដែលធ្លាប់តែជាស្តេចសត្វព្រៃមួយក្បាលនេះ ចុះពីលើដើមឈើ រួចក៏រត់គេចខ្លួនដោយសុវត្ថិភាព។លោក Neelutpaul Barua អាយុ៣៩ឆ្នាំ មកពីទីក្រុងម៉ុបៃ ប្រទេសឥណ្ឌា គឺជាអ្នកថតបានរូបភាពដ៏គួរភ្ញាក់ផ្អើលទាំងនេះ ខណៈពេលដែលលោកបានមកលេងឧទ្យានជាតិ Lake Nakuru ។លោក Barua បាននិយាយថា ហ្វូងក្របីទាំងអស់នេះ បានបង្ហាញពីភាពអង់អាចរបស់ពួកវា ដើម្បីតតាំងជាមួយសត្វតោ ធ្វើឲ្យសត្វតោរត់បាតជើងសព្រាត ឡើងទៅលើដើមអាកាស្យា។
លោកបន្តថា រឿងដែលគួរឲ្យអស់សំណើចនោះត្រង់ថា សត្វតោមួយក្បាលនេះ ព្យាយាមឡើងខ្ពស់ តែមានអីធ្លាក់ចុះក្រោមវិញ ហើយដោយសារតែវាដឹងថា វាមិនអាចនៅលើដើមឈើបានយូរនោះ វាបានព្យាយាមគ្រហឹមដាក់ហ្វូងក្របី ដើម្បីឲ្យពួកវាចេញទៅឆ្ងាយ៕
