…បុរសម្នាក់នេះ បើមិនមែនជាឪពុករបស់ក្មេងប្រុសក៏ត្រូវជាសាច់ញាតិដែរប៉ុន្តែបែរជាមានគំនិតចង់ថតរូបភាពឆ្កួតៗអត់ខ្លាចគ្រោះថ្នាក់អ្វីបន្តិចណាសោះដល់ក្មេងប្រុស។ រឿងរ៉ាវដ៏គួរឲ្យហួសចិត្តមួយស្តីពីវីដេអូឃ្លីបមួយ ដែលត្រូវបានថតបង្ហោះ នូវសកម្មភាពក្មេងប្រុសម្នាក់លៀនអណ្ដាត លលេងជាមួយពស់ បណ្ដាលឲ្យពស់ខាំជាប់អណ្ដាត។
បើតាមប្រភពបានឲ្យដឹងថា វីដេអូឃ្លីបនេះត្រូវបានថតឡើងនៅក្នុងខេត្ត Makassar ប្រទេសឥណ្ឌូនេស៊ី និងត្រូវបានគេយកទៅបង្ហោះចែកចាយលើបណ្ដាញអ៊ិនធើណែត ដោយទទួលបានការចាប់អារម្មណ៍យ៉ាងខ្លាំង។ តាមរយៈវីដេអូឃ្លីបបង្ហាញឲ្យឃើញថា បុរសម្នាក់បានកាន់កូនពស់ថ្លាន់មួយក្បាល និងផ្លុំខ្យល់ចូលទៅក្នុងមាត់វា។ បន្ទាប់មក គាត់បានដាក់ពស់នោះចំពីមុខក្មេងប្រុសម្នាក់ ដែលកំពុងលៀនអណ្ដាតចេញមកក្រៅ។ ភ្លាមៗនោះ ស្រាប់តែពស់បានស្ទុះទៅខាំជាប់អណ្ដាតរបស់ក្មេងប្រុសនោះ បណ្ដាលស្រែកយំ ដោយដៃទាំងសងខាងព្យាយាមទាញពស់នោះចេញ។ ក្រោយពីទាញពស់ចេញរួចមក ក្មេងប្រុសនោះបានអង្គុយយំ ដោយមានហូរឈាមចេញពីអណ្ដាតទៀតផង។ ជុំវិញនឹងរឿងរ៉ាវខាងលើនេះ គេមិនច្បាស់ទេថា ក្រោយកើតហេតុ ក្មេងប្រុសនោះរងរបួសធ្ងន់ធ្ងរឬយ៉ាងណានោះទេ។
ទន្ទឹមនឹងនេះ ក៏មានមហាជននៅលើបណ្ដាញអ៊ិនធើណែតបានបញ្ចេញមតិថា៖ តើម្ដាយរបស់ក្មេងប្រុសនោះនៅឯណា? ហេតុអ្វីបានជាបណ្ដោយឲ្យលេងបែបនេះ?ហើយចំពោះ បុរសនោះពិតជាឆ្កួតខ្លាំងណាស់ដែលយកពស់មកប្រលែងលេងជាមួយក្មេងបែបនេះ៕