…នៅស្រុកខ្មែររឿងចោរបើកឡានដើរលួចគោដែលអ្នកស្រុកព្រលែងឲ្យស៊ីស្មៅនៅឯវាលស្រែបានកើតឡើងជារឿយៗរួចមកហើយអត់ដែលចាប់បានឡាននោះឡើយ។ ដោយឡែករឿចោរកម្ម បែបនេះនៅស្រុកគេក៏មានដែរថែមទាំងទំនើបជាងចោរក្នុងស្រុកយើងទៀតផងគឺប្រើប្រាស់រថយន្តយ៉ាងទំនើបតែស៊យលួចគោអត់បាន…រថយន្តជាប់អន្ទាក់ ម្ចាស់រថយន្តគេចខ្លួនរួចមែន តែប្រាកដជាដេកយំផឹកស្តាយរថយន្តតម្លៃខ្ទង់សែនដុល្លារ ឯណ្ណោះ!។
សត្វគោ ៣ ក្បាលត្រូវបានគេប្រទះឃើញដេកក្នុងរថយន្ដទំនើបមួយគ្រឿងម៉ាក Honda Odyssey ពណ៌ខ្មៅ ពុំមានស្លាកលេខ ស្ថិតក្នុងសភាពជាប់គាំងទៅមុខលែងរួចខណៈកង់ក្រោយផ្នែកខាងស្ដាំ បានបែក។ យោងតាមស្នងការប្រចាំស្រុក Pekan ម្នាក់ លោក Mohd Razli បានប្រាប់ឲ្យដឹងថា នៅម៉ោងប្រហែល ៧ និង ៣០ នាទីថ្ងៃទី ៩ ខែកុម្ភៈ មានអ្នកស្រុកបានរាយការណ៍ប្រាប់លោកពីករណីខាងលើ ហើយលោកក៏ចុះទៅដល់ទីតាំងកើតហេតុនោះ ភ្លាមៗ។ ក្រោយទៅដល់ ប៉ូលិសបានធ្វើការត្រួតពិនិត្យនឹងរកឃើញថារថយន្តសេរីទំនើបនេះពុំមានលេខចុះបញ្ជីត្រឹមត្រូវនោះទេ ហើយមូលហេតុដែលម្ចាស់ចតទុកចោល ព្រោះរថយន្ដបែកកង់ ដោយសារការផ្ទុកទម្ងន់លើស។
លោកស្នងការ បានរៀបរាប់លម្អិតថា៖ ក្រុមប៉ូលិសរបស់យើងបានចាំឃ្លាំមើលនៅទីតាំងកើតហេតុអស់រយៈពេល ៣០ នាទី ប៉ុន្ដែគ្មាននរណាម្នាក់ទៅទីនោះឡើយ។ តែអ្នកស្រុកនៅតំបន់នោះបានជួយយើងឲ្យរកឃើញបុរសវ័យ ៦៥ ឆ្នាំដែលជាម្ចាស់គោ៕
