…កំពុងតែស្លុងអារម្មណ៍អត់បានមើលផ្លូវបុកគូទគេផាំងដួលប្រាវក្នុងចិត្តនឹកថា ប្រាកដជាខ្មាស់គេដូចស្រាតសំពត់នៅកណ្តាលវាលហើយតែភ្លាមៗនោះអារម្មណ៍មួយបាននឹកឃើញភ្លែតផ្លាស់ប្តូរសភាពការណ៍បង្កើតឲ្យទៅជាចំណាប់អារម្មណ៍បែបផ្សេងទៅវិញ រហូតមានអ្នកខ្លះទៅជាចាត់ទុកថាជាឈុតសំដែងទៅវិញទៀតផង។នារីវ័យក្មេងជនជាតិចិនម្នាក់នេះ រវល់តែជក់មើលទូរស័ព្ទ ខណៈពេលកំពុងតែបើកម៉ូតូ រហូតជ្រុលក្បាលទៅបុកគូទម៉ូតូអ្នកដទៃ បណ្តាលឲ្យដួលខ្លួនឯង តែនៅឆ្លៀតទាញទូរស័ព្ទ ដេកចុចកណ្តាលថ្នល់ធ្វើរំភើយថែមទៀត។
ហេតុការណ៍ដ៏គួរឲ្យអស់សំណើចនេះ បានកើតឡើងនៅតាមបណ្តោយផ្លូវមួយកន្លែង ស្ថិតក្នុងទីក្រុង Taizhou ខេត្ត Zhejiang ប្រទេសចិន។ នេះបើយោងតាមការចុះផ្សាយពីសារព័ត៌មានចិន Shanghaiist ។តាមរយៈសកម្មភាពក្នុងវីដេអូឃ្លីប ថតជាប់ដោយកាម៉េរាសុវត្ថិភាពតាមផ្លូវ នៅក្នុងថ្ងៃកើតហេតុ គេឃើញ នារីវ័យក្មេងជាអ្នកបើកម៉ូតូវ៉ែស្ប៉ា ឬម៉ូតូកូនទា ហាក់រវល់អោនមើលទូរស័ព្ទរបស់នាង ទាំងធ្វេសប្រហែសក្នុងអំឡុងពេលបើកបរ ចៃដន្យ ក៏ជ្រុលទៅប៉ះគូទម៉ូតូមួយគ្រឿងទៀតនៅពីមុខនាង រហូតបណ្តាលឲ្យដួលភ្លាមៗ ត្រឡប់ត្រឡិនតែម្នាក់ឯង។ ប៉ុន្តែអ្វីដែលគួរឲ្យចាប់អារម្មណ៍ និងធ្វើឲ្យគ្រប់គ្នាហួសចិត្តនោះ នារីរងគ្រោះបែរជានៅបន្តទាញទូរស័ព្ទដៃមកចុចមើល ទាំងខ្លួនឯងដេកដួលនៅលើផ្លូវថ្នល់ធ្វើព្រងើយ។ទោះបីជាយ៉ាងណាក្តី ជាសំណាងល្អ នារីរងគ្រោះត្រូវបានគេរាយការណ៍ថា មិនបានរងរបួសធ្ងន់ធ្ងរអ្វី នៅក្នុងហេតុការណ៍នោះឡើយ។
ចំពោះរឿងរ៉ាវ នេះក៏ជាសារមួយ ជួយដាស់តឿនដល់អ្នកបើកបរទាំងអស់ គួរណាស់ត្រូវហាមប្រាមប្រើប្រាស់ទូរស័ព្ទ នៅក្នុងកំឡុងពេលបើកបរ ដើម្បី ចៀសវាងកើតមានគ្រោះថ្នាក់ជាយថាហេតុណាមួយកើតឡើង ដូចករណីនារីរងគ្រោះខាងលើនេះ ៕
