…គេធ្លាប់តែឃើញជនពិការដៃទាំងសងខាងដើរសុំទាននៅលើដងផ្លូវ ប៉ុន្តែគេប្រាកដជាមានការភ្ញាក់ផ្អើលជាខ្លាំងចំពោះជនពិការដៃទាំងសងខាងដែលប្រកបកិច្ចការអ្វីមួយដូចមនុស្សដែលមានដៃទាំងគូរដែរ។ ដូចជាទេកោសល្យរបស់បុរសពិការដៃទាំងគូរម្នាក់នេះប្រសិនបើពុំបានឃើញប្រាកដជាពុំសូវជឿប៉ុន្មាននោះទេ តែក្រោយពីបានឃើញហើយនោះមិនដឹងជាពោលសរសើរយ៉ាងណានោះទេ។យុវជនវ័យក្មេង ស្រស់សង្ហាសញ្ជាតិអាហ្សង់ទីនម្នាក់ នេះកំពុងតែទទួលបានការកោតសរសើរ និងការលើកទឹកចិត្តជាខ្លាំង ពីសំណាក់មហាជនទូទៅ បើទោះបីខ្លួនជាមនុស្សពិការដៃទាំងសងខាងក្តី តែមានឆន្ទៈខ្ពស់តស៊ូនឹងជីវិត រហូតក្លាយជាជាង និងថៅកែហាងកាត់សក់ដ៏ល្បីឈ្មោះមួយ ប្រចាំតំបន់ថែមទៀត។
លោក Gabriel Heredia មានអាយុ ២០ឆ្នាំ ជាជនពិការដៃទាំងសងខាង កំបុតពាក់កណ្តាលត្រឹមកែងដៃ គ្មានម្រាម រស់នៅក្នុងរដ្ឋធានី Buenos Aires ប្រទេសអាហ្សង់ទីន។ដោយសារតែ មានម្តាយជាជាងកាត់សក់ស្រាប់ និងខ្លួនឯងផ្ទាល់មានចំណាប់អារម្មណ៍ ស្រលាញ់ចូលចិត្តផ្នែកការងារមួយនេះផងនោះ ទើបនៅអាយុ១៤ឆ្នាំ លោក Gabriel ក៏បានចាប់ផ្តើមរៀនជំនាញមួយនេះ ពីបច្ចេកទេសនៃការកាត់សក់បុរស ស្ទីលលេងម៉ូត និងកោរពុកមាត់ជាដើម ក៏ព្រោះលោកតែងតែគិតថា នៅថ្ងៃណាមួយលោកនឹងអាចធ្វើវាបានដោយជោគជ័យ ក៏ដូចជាអាចរកប្រាក់ចិញ្ចឹមជីវិត ជួយខ្លួនឯងនិងគ្រួសារបានផងដែរ។រហូតនៅទីបំផុត ការតាំងចិត្តយ៉ាងមោះមុតនេះ ពិតជាអាចធ្វើឲ្យ Gabriel អាចយកឈ្នះបាន ក្លាយទៅជាងដ៏មានជំនាញ និងមានហាងកាត់សក់ផ្ទាល់ខ្លួនថែមទៀត ដោយទទួលបានការជួយជ្រោមជ្រែងមួយចំនួន ពីក្រុមគ្រួសាររបស់លោក ហើយក៏មានការគាំទ្រយ៉ាងខ្លាំង ពីសំណាក់មហាជនទូទៅ ចំពោះស្នាដៃរបស់លោកផងដែរ។លើសពីនេះ លោក Gabriel ថែមទាំងបានហ្វឹកហាត់ខ្លួនឯងជាច្រើន រួមទាំងការញ៉ាំអាហារ កាន់កែវទឹកបានដោយខ្លួនឯង រៀនបើកម៉ូតូ និងសូម្បីតែរៀនបើករថយន្ត ក៏លោកអាចធ្វើវាបានដែរ ដោយលោកមិនឲ្យជីវិតដ៏កំសត់ជាមនុស្សពិការដៃនេះ មកគ្របដណ្តប់លើជោគវាសនារបស់លោកបានឡើយ។ជាងកាត់សក់វ័យក្មេង ស្រស់សង្ហារូបនេះ បាននិយាយថា រាល់ដងនៅពេលដែលភ្ញៀវចូលមកដល់ហាង ពួកគេមើលទៅហាក់បីដូចជាមិនរីករាយឡើយ ពេលដែលលោកកាត់សក់ឲ្យពួកគេ។
ប៉ុន្តែផ្ទុយទៅវិញ ក្រោយលោកបានកាត់ឲ្យរួចរាល់ ភ្ញៀវសឹងតែមួយចំនួនធំទៅហើយ បាត់មាត់និយាយលែងចេញតែម្តង ព្រោះតែពួកគេមិននឹកស្មានថា រូបលោកអាចធ្វើវាបាន ហើយថែមទាំងស្អាតសង្ហាថែមទៀត។លោកថា បច្ចុប្បន្ននេះមានភ្ញៀវជាច្រើនស្គាល់លោក និងតម្រង់ជួរគ្នារង់ចាំឲ្យលោកកាត់សក់ឲ្យពួកគេ ដោយមិនមានភាពស្ទាក់ស្ទើរ និងគិតពីលោកមិនល្អដូចពីមុននោះឡើយ ៕
