…ស្ត្រីជាម្តាយចុងម្នាក់នេះមានចិត្តខ្មៅគួរឲ្យស្អប់ខ្ពើមក្រៃលែងលើកដៃទៈតប់កូនស្រីតូចជាដើមរបស់ប្តី…ជួបនូវក្តីមរណ តែបាបកម្មនាងក៏ត្រូវប៉ូលិសចាប់ខ្លួន…ហើយបើទោះបីជាតុលាការពុំទាន់កាត់សេចក្តីមែន…តែទោសរបស់នាងប្រាកដជាធ្ងន់ណាស់ហើយ។ ក្មេងស្រីជនជាតិចិនអាយុ ៧ ឆ្នាំម្នាក់រស់នៅក្នុងខេត្ត Shandong ប្រទេសចិនត្រូវបានម្តាយចុង យកដំបងដែក វាយធ្វើបាបរហូតដល់ស្លាប់ ព្រោះខឹងនឹងនាងញុំាបាយយឺតពេក ។
យោងតាមការចុះផ្សាយនៅលើ China Press បានអោយដឹងថា ក្មេងស្រីរងគ្រោះ ឈ្មោះ Guo Mou ។ នៅថ្ងៃកើតហេតុ វេលាថ្ងៃត្រង់ ក្មេងស្រីរងគ្រោះបានញុំាបាយ ជាមួយនឹងម្តាយចុង ហើយស្ត្រីជាម្តាយចុង បានគម្រាមនាងថា «ប្រសិនបើឯងញុំាបាយយឺត យើងនឹងវាយឯងហើយ» ។ បន្ទាប់មកម្តាយចុងនោះក៏បានដឹកដៃក្មេងស្រីរងគ្រោះចូលទៅក្នុងបន្ទប់គេងរបស់នាង ហើយខ្ទាស់សោរទ្វារ រួចក៏ចាប់ផ្តើមយកដំបងដែកវាយសំពងទៅលើក្មេងស្រីរងគ្រោះតែម្តង ។ ប្រភពព័ត៌មានដដែលបានបន្តថា ខណៈពេលនោះផងដែរ ឪពុកបង្កើតរបស់នាងក៏នៅផ្ទះដែរ តែគាត់នៅក្រៅបន្ទប់ ហើយមិនហ៊ានចូលទៅជួយកូនស្រីទេ ព្រោះគាត់ក៏ធ្លាប់ត្រូវបានប្រពន្ធចុងនេះវាយអោយរបួសម្តងដែរ ។ រយៈពេលប្រហែល ១ ម៉ោង ឪពុកក៏បើកទ្វារបន្ទប់ ហើយក៏ប្រទះឃើញកូនស្រីជាំធ្ងន់ធ្ងរ ពេញខ្លួនប្រាណ ហើយគាត់ក៏បានឈ្លោះគ្នាជាមួយនឹងប្រពន្ធចុងអំពីរឿងនេះ ប៉ុន្តែគាត់មិនទាន់បាននាំកូនស្រីទៅមន្ទីរពេទ្យភ្លាមៗទេ ផ្ទុយទៅវិញគាត់បែរជាចេញទៅក្រៅផ្ទះជក់បារីធ្វើមិនដឹង ។នៅពេលដែលគាត់ត្រលប់មកផ្ទះវិញ ប្តីប្រពន្ធនេះនៅតែបន្តឈ្លោះគ្នាទៀត ដោយប្រពន្ធចុងនោះប្រកែកមិនព្រមអោយនាំក្មេងស្រីរងគ្រោះទៅមន្ទីរពេទ្យទេ ព្រោះតែនាងបានឃើញស្ថានភាពក្មេងស្រីនោះហាក់ដូចជាធ្ងន់ធ្ងរពេក ។ ទោះបីជាយ៉ាងណាក៏ដោយ បុរសជាឪពុកនោះក៏បាននាំកូនស្រីទៅមន្ទីរពេទ្យ ប៉ុន្តែវាហួសពេលទៅហើយ ពេលដែលទៅដល់មន្ទីរពេទ្យ ១០ នាទី គ្រូពេទ្យក៏ប្រាប់ថាក្មេងស្រីរងគ្រោះមិនអាចសង្គ្រោះជីវិតបានទេ ។
បើតាមសំដីឪពុកក្មេងស្រីរងគ្រោះបានអោយដឹងថា គាត់បានលែងលះជាមួយនឹងប្រពន្ធដើម តាំងពីកូនស្រីមានអាយុ ២ ខែម្ល៉េះ ហើយគាត់បានបន្តថា ជារឿយៗប្រពន្ធចុងគាត់តែងតែវាយធ្វើបាបកូនស្រីគាត់ ទោះនាងខុសតិចតួចក៏ដោយ ប៉ុន្តែវាយមិនដល់ថ្នាក់ហ្នឹងទេ ។ ក្រោយកើតហេតុម្តាយចុងរូបនោះ ក៏ត្រូវបានប៉ូលីសចាប់ខ្លួនពីបទប្រើអំពើហិង្សាលើកុមារ ៕
