[wai id="5"]
...កាលពីនៅក្មេង...អ្នកស្រី Shi Xiaoqin ពុំបានចូលសាលារៀននោះទេព្រោះតែជីវភាពគ្រួសារក្រីក្រ…លុះដល់ពេញវ័យក្រមុំមានស្វាមី មានបុត្រ ជីវភាពក៏នៅតែក្រីក្រដែលតំរូវឲ្យអ្នកស្រីត្រូវតែស្វែងរកការងារធ្វើបានចំណូល ប៉ុន្តែដោយសារតែអ្នកស្រីអត់ចេះអក្សរ…ទើបពិបាករកការងារធ្វើ។ដោយសារតែបែបនេះអ្នកស្រី Shi បានបោះជំហានចូលសាលារៀនក្រោមការប្តេជ្ញាចិត្តយ៉ាងមោះមុតប្រឹងរៀនឲ្យចេះអានអក្សរងាយស្រួលរកការងារធ្វើ!។ ស្ត្រីជាម្តាយ រូប នេះរស់នៅភាគខាងត្បូងនៃប្រទេសចិន បានសម្រេចចិត្តចុះឈ្មោះចូលរៀនថ្នាក់មត្តេយ្យជាមួយកូនស្រីអាយុ៥ឆ្នាំរបស់ខ្លួន។
ពាណិជ្ជកម្ម
អ្នកស្រី Shi Xiaoqin បានសង្ឃឹមថា ការចូលរៀននេះនឹងអាចជួយឲ្យខ្លួនឯងមានសមត្ថភាពអាចបង្រៀនកូនបន្ថែមទៀត ហើយក៏ងាយស្រួលក្នុងការស្វែងរកការងារដែលល្អមួយដែរ។អ្នកម្តាយកូនពីរ វ័យ ៣១ឆ្នាំ រូបនេះ បានប្រាប់ទៅកាន់ប្រព័ន្ធផ្សព្វផ្សាយក្នុងស្រុកថា មានហេតុផលច្រើនណាស់ដែលធ្វើឲ្យអ្នកស្រីមិនអាចចូលសាលា កាលពីអ្នកស្រីនៅក្មេង ហើយការដែលគ្មានចំណេះដឹងក្នុងខ្លួននេះ បានធ្វើឲ្យអ្នកស្រីពិបាកក្នុងការស្វែងរកការងារមែនទែន ទោះបីជាការងារនៅក្រៅទីរួមខេត្ត Guizhou ក៏ដោយ។ជំនួសឲ្យភាពអាម៉ាស់ និងការមាក់ងាយពីអ្នកដទៃ អ្នកស្រី Shi បានចូលរៀនជាមួយកូនស្រីដោយក្តីរីករាយ ហើយអ្នកស្រីថែមទាំងលេងជាមួយមិត្តរួមថ្នាក់ នៅម៉ោងសម្រាកថែមទៀតផង។អ្នកស្រីបានប្រាប់ទៅកាន់សារព័ត៌មាន South China Morning Post ថា៖«ខ្ញុំមិនខ្វល់ថានរណានិយាយអ្វីពីខ្ញុំទេ។ ការដែលមករៀនជាមួយកូនស្រីនេះ មិនត្រឹមតែធ្វើឲ្យខ្ញុំទទួលបានចំណេះដឹងទេ ថែមទាំងអាចឲ្យខ្ញុំបង្រៀនកូនស្រីរបស់ខ្ញុំបានល្អថែមទៀតផង។» «នៅពេលដែលខ្ញុំអាចចេះអានចេះសរសេរហើយនោះ ខ្ញុំនឹងអាចជួយបង្រៀនកូនស្រីរបស់ខ្ញុំនៅផ្ទះបន្ថែមបាន ហើយនៅពេលដែលនាងធំឡើង នាងនឹងមានឱកាសទទួលបានការងារដែលល្អ។» អ្នកស្រី Shi ដែលទើបតែចូលរៀនកាលពីមួយខែមុននេះ នៅតែមានទំនួលខុសត្រូវលើកិច្ចការងារក្នុងផ្ទះដដែល។ បន្ទាប់ពីចេញពីសាលា អ្នកស្រីត្រូវធ្វើការងារជាច្រើន សម្រាប់កូនៗ និងយាយតារបស់ពួកគេ ខណៈដែលប្តីរបស់អ្នកស្រីត្រូវទៅធ្វើការឆ្ងាយពីផ្ទះ ក្នុងកិច្ចការពាក់ព័ន្ធនឹងវិស័យសំណង់។ទោះបីជា វាដូចជាពិបាកក្នុងការបែងចែកពេលវេលាឲ្យបានត្រឹមត្រូវដើម្បីបំពេញកាតព្វកិច្ចទាំងនេះមែន ប៉ុន្តែអ្នកស្រីនៅតែអាចធ្វើឲ្យវាមានដំណើរការល្អ៕