[wai id="5"]
…ក្រោយពីដឹងថាជីវិតរបស់ខ្លួនកំពុងតែប្រៀបបានជាពន្លឺចង្កៀងហៀបនឹងអស់ប្រេងទៅហើយនោះ…បុរសជាឪពុកម្នាក់នេះអត់ភ័យតក់ស្លុតពីសេចក្តីស្លាប់នោះឡើយតែផ្ទុយទៅវិញគាត់បែជាមានចិត្តព្រួយបារម្មណ៍ទៅដល់កូនទាំង៧នាក់របស់គាត់។គាត់ពុំមានសេសសល់ទ្រព្យសម្បត្តិអ្វីចែកដល់កូនៗនោះទេ…តែគាត់បានបន្សល់ទុកនូវបណ្តាំសម្រាប់ឲ្យកូនៗនាំជីវិតបោះជំហានទៅរកភាពសុខសប្បាយ។សេចក្តីស្រឡាញ់ដោយគ្មានលក្ខខណ្ឌ របស់ឪពុកម្តាយ គឺជាអ្វីដែលធ្វើឱ្យកូនៗមានការតស៊ូក្នុងជីវិត មិនថា មានការលំបាកយ៉ាងណាក៏ដោយ។ ឪពុកម្តាយបាន លះបង់ច្រើនណាស់ ដើម្បីផ្តល់ឱ្យជីវិត រស់បានល្អប្រសើរ។
ពាណិជ្ជកម្ម
យ៉ាងណាមិញ គ្រួសារមួយដែលមានកូនដល់ទៅ ៧នាក់ ព្រមទាំងម្តាយពួកគេនោះវិញ ពិតជាបានធ្វើឲ្យមនុស្សគ្រប់គ្នាមានក្តីអាណិត ហើយខ្លេាចចិត្តជាខ្លាំង ក្រោយពីបានទទួលសារជាលើកចុងក្រោយដ៏សែនក្រៀមក្រំមួយ ដែលបានបន្សល់ទុកពីឪពុករបស់ពួកគេ ដែលបានបង្ហាញពីអារម្មណ៍អស់ពីដួងចិត្ត ចំពោះពួកគេទាំងអស់គ្នា មុនពេលលាចាកលោកដោយសារជំងឺបេះដូង។ រឿងរំជួលចិត្តនេះបានកើតឡើងនៅប្រទេសសិង្ហបុរី បុរសជាឪពុក មានអាយុ ៤៥ឆ្នាំ ធ្វើការជាអ្នកលក់ឧបករណ៍អេឡិចត្រូនិកប្រាក់ខែជិត ៩០០ដុល្លារ ។ គាត់រស់នៅផ្ទះល្វែងជួលមួយកន្លែង មាន ២បន្ទប់ ជាមួយប្រពន្ធ និងកូន ៧នាក់របស់គាត់។គាត់បានផ្ញើសារដោយរៀបរាប់ថា៖ «សួស្តីកូនជាទីស្រឡាញ់ នេះជាការឈឺចាប់ទ្វេដងរបស់ប៉ា វាដូចជាធ្លាក់នរកអីចឹង ដង្ហើមបូករួមជាមួយនិងខួរក្បាលពាក់កណ្តាលរបស់ប៉ា គឺមិនអាចដំណើរការបាន។ ហាក់ដូចជាចង់ផុតដង្ហើមឥឡូវនេះ។ តែសង្ឃឹមថា នឹងមិនមានរឿងអាក្រក់កើតឡើងទៅចុះ ប៉ុន្តែបើវាកើតឡើងទៅហើយ..ប៉ាចង់ឲ្យកូនទាំងអស់គ្នាសន្យាជាមួយប៉ាបានទេថា..កូនៗត្រូវចេះសាមគ្គីគ្នា ក្នុងចំណោមបងប្អូនទាំងអស់មិនត្រូវទុកនរណាម្នាក់ចោលឡើយ ត្រូវចេះស្រលាញ់គ្នា ជួយគ្នា។ សូមជួយមើលថែម៉ាក់ឯង និងជាប្រពន្ធសម្លាញ់របស់ប៉ា កុំទុកឲ្យគាត់នៅម្នាក់ឯងទោះក្នុងកាលៈទេសៈណា ត្រូវការពារគាត់ ស្រលាញ់គាត់ និងចេះព្រួយបារម្ភចំពោះម៉ាក់ជំនួសប៉ាផង។ សូមផ្ដល់អ្វីដែលគាត់ចង់បាន មិនត្រូវទុកម៉ាក់ចោល ឮទេ?ប៉ាពិតជាសោកស្ដាយខ្លាំងណាស់ ដែលមិនអាចផ្ដល់ឲ្យកូនគ្រប់គ្នានូវជីវិតគាប់ប្រសើរបានយូរអង្វែង ប៉ុន្តែប៉ាបានប្រឹងប្រែងខ្លាំងណាស់រាល់ថ្ងៃនេះ តែនៅមិនអាចបំពេញសេចក្ដីត្រូវការរបស់ជីវិតបាន។ ប៉ាសុំទោស.. តែប៉ាសប្បាយរីករាយដែលមានកូនៗទាំងអស់ជាសមាជិកគ្រួសារ។ សូមស្រលាញ់ម៉ាក់ឯងឲ្យច្រើនៗ ដូចដែលប៉ា បានស្រលាញ់គាត់ ក្រោយរៀបការអីចឹងដែរ។ប៉ាបានជំពាក់គុណគាត់ច្រើនណាស់ ប្រសិនបើរឿងអាក្រក់ណាមួយកើតមកលើប៉ាពេលនេះ សូមធ្វើឲ្យជីវិតគាត់រីករាយ គឺជារឿងសំខាន់បំផុតដំបូងគេ។ សារទាំងនេះមិនមែនជារឿងកំប្លែងទេ វាប្រាកដជាកើតឡើងចំពោះប៉ា អីចឹងហើយទើបប៉ាសម្រេចសរសេរសារទាំងនេះឡើង»។បន្ទាប់ពីទទួលបានសារតាមរយៈ WhatsApp គួរឱ្យស្លុតចិត្ត កូនស្រីរបស់គាត់ បានណែនាំគាត់ឱ្យស្វែងរកការព្យាបាលជាបន្ទាន់ ប៉ុន្តែគាត់បានផ្ដាច់ទំនាក់ទំនងដើម្បីកុំឲ្យនាងបារម្ភខ្លាំងពេក ហើយគាត់បានទៅធ្វើការដូចធម្មតា។ ជាអកុសល ២ថ្ងៃក្រោយ ស្ថានភាពរបស់គាត់ក្លាយជាអាក្រក់ខ្លាំង ហើយត្រូវបានបញ្ជូនទៅកាន់មន្ទីរពេទ្យមុនពេលគាត់ស្លាប់៕