[wai id="5"]
…សេចក្តីព្យាយាមធ្វើបន្តិចម្តងៗជារៀងរាល់ថ្ងៃគង់សម្រេចបានលទ្ធផលនៅថ្ងៃខាងមុខ ប្រៀបបានជាតក់ៗពេញបំពង់យ៉ាងអញ្ជឹងដែរ។ដូចបុរសឥណ្ឌាម្នាក់នេះគាត់តែម្នាក់ឯងទេបានដាំដើមឈើរហូតក្លាយទៅជាព្រៃមើលដាច់កន្ទុយភ្នែក មានខ្លា ដំរី សត្វច្រើនប្រភេទទៀតចូលមករស់…។បុរសជនជាតិឥណ្ឌាម្នាក់នេះឈ្មោះ Jadav Payeng រស់នៅលើកោះទន្លេធំបំផុតលើពិភពលោក ឈ្មោះ Majuli ស្ថិតនៅកណ្តាលទន្លេ Bramaputra River នៃប្រទេសឥណ្ឌា ដែលហូរកាត់ប្រទេសចិន ឥណ្ឌា និង បង់ក្លាដេស។
ពាណិជ្ជកម្ម
កោះឥណ្ឌាមួយនេះបានជួបប្រទះសំណឹកដីយ៉ាងធ្ងន់ធ្ងរ ដោយសារតែទឹកជំនន់ញឹកញាប់។ ជារៀងរាល់ឆ្នាំ ក្នុងអំឡុងពេលរដូវមូសុង ទន្លេនេះបានបំផ្លាញផ្ទះ និង កសិដ្ឋានជាច្រើន រួមទាំងដីរាប់រយគីឡូម៉ែត្រការ៉េទៀតផង។ទោះជាយ៉ាងណា នៅក្នុងអំឡុងទសវត្សរ៍ឆ្នាំ១៩៧០ លោក Payeng បានទប់ស្កាត់បញ្ហានេះ ដោយការដាំដើមឈើក្នុងមួយថ្ងៃមួយដើម ហើយរយៈពេលជាង ៤០ ឆ្នាំមកនេះ លោកបានដាំដើមឈើ រហូតដល់ទៅ ១ ៤០០ ហិកតាឯណោះ។លោក Payeng បានបង្កើតព្រៃទាំងមូលទៅហើយ ដោយសត្វព្រៃមួយចំនួន ដូចជា រមាស ខ្លា និងដំរី ក៏បានមករស់នៅទីនោះផងដែរ។ បុរសជនជាតិឥណ្ឌារូបនេះ ត្រូវបានអតីតប្រធានាធិបតីឥណ្ឌា ដាក់រហស្សនាមឲ្យថា «Forest Man of India»។លោក Jadav បាននិយាយថា«ខ្ញុំបានដាំអ្វីៗទាំងអស់ដោយខ្លួនឯង។ ដំបូងឡើយ ការដាំដុះត្រូវការចំណាយពេលច្រើន ប៉ុន្តែឥឡូវនេះ វាកាន់តែងាយស្រួល ព្រោះខ្ញុំទទួលបានគ្រាប់ពូជពីដើមឈើទាំងនោះផ្ទាល់»។ បុរសឥណ្ឌារូបនេះ បានបញ្ជាក់ឲ្យដឹងទៀតថា ចាប់តាំងពីវាក្លាយជាព្រៃក្រាស់មក មានសត្វដំរីចំនួន ១១៥ ក្បាល បានមករស់នៅទីនោះ រយៈពេល ៣ ខែក្នុង ១ ឆ្នាំ ហើយក៏មានសត្វក្ដាន់ រមាស និងខ្លាជាច្រើនក្បាលផងដែរ៕
