[bg-ads]
[wai id="7"]
ទីក្រុងវូហាន (Wuhan) នៃខេត្តហ៊ូប៉ី (Hubei) ភាគកណ្តាលប្រទេសចិន ដែលជាកន្លែងនៃប្រភពវីរុស COVID-19 ត្រូវបាន អ្នកជំនាញសុខភាពភិបាលចិនលើកឡើងថា នឹងអាចមើលឃើញនូវការធ្លាក់ចុះអ្នកឆ្លងមេរោគ COVID-19 ថ្មីៗដល់កម្រិត «សូន្យ» តែម្តងនាចុងខែមីនា ឆ្នាំ២០២០។ នេះបើតាមទីភ្នាក់ងារព័ត៌មាន Reuters ។
ប្រទេសចិនបានរាយការណ៍នៅថ្ងៃ០៥មីនានេះថា ចំនួនមនុស្សស្លាប់ដោយសារវីរុសកូរ៉ូណាឬកូវីដ-១៩ សរុបមានជាង៣ពាន់នាក់ហើយ ក្នុងនោះមានអ្នកជំងឺទើបស្លាប់ចំនួន៣១នាក់។ អ្នកទើបស្លាប់គឺនៅក្នុងខេត្ដហ៊ួប៉ីទាំងអស់ ជាខេត្ដផ្ទុះវីរុសកូរ៉ូណាដំបូងគេ ដោយនៅក្នុងទីក្រុងវូហានមានអ្នកទើបស្លាប់ចំនួន២៣នាក់។ សរុបមនុស្សស្លាប់ទាំងអស់នៅក្នុងទឹកដីចិនមានចំនួន៣,០១២នាក់គិតត្រឹមថ្ងៃទី០៤មីនា។ ចំពោះករណីឆ្លងថ្មីវិញមានចំនួន១៣៩ករណីគិតត្រឹមថ្ងៃទី០៤មីនា ធ្វើឲ្យមានករណីឆ្លងសរុបចំនួន៨០,៤០៩នាក់។
ដោយឡែកសម្រាប់ប្រទេសកូរ៉េខាងត្បូងបានរាយការណ៍នៅថ្ងៃសុក្រទី៦ ខែមីនានេះថាបានរកឃើញករណីឆ្លងវីរុស COVID-19 ថ្មីចំនួន ១៩៦ ករណីក្នុងរយៈពេលមួយយប់មិញ ដែលនាំឱ្យចំនួនអ្នកឆ្លងសរុបក្នុងប្រទេសឡើងដល់ ៦២៨៤ នាក់ ខណៈការឆ្លងថ្មីៗភាគច្រើននៅតែកើតមាននៅក្នុងទីក្រុងភាគអាគ្នេយ៍ Daegu និងនៅខេត្ត North Gyeongsang ដែលនៅជាប់គ្នា។
មជ្ឈមណ្ឌលគ្រប់គ្រងនិងបង្ការជំងឺកូរ៉េ (KCDC) បាននិយាយថារហូតមកដល់ពេលនេះមនុស្ស ៤២ នាក់ដែលភាគច្រើន ជាអ្នកជំងឺវ័យចំណាស់ និងមានជំងឺប្រចាំកាយស្រាប់បានស្លាប់នៅក្នុងប្រទេសកូរ៉េខាងត្បូង ក្រោយឆ្លងវីរុសផ្លូវដង្ហើមថ្មីនេះ។
អ្នកជំងឺប្រហែល ៦០ ភាគរយសុទ្ធតែមានទំនាក់ទំនងនឹងក្រុមនិកាយសាសនាស៊ីនឆុនជី (Shincheonji) ក្នុងទីក្រុងដាហ្គូ ដែលជាទីក្រុងធំបំផុតទី ៤ របស់ប្រទេសនេះ។
[wai id="6"]
