[wai id="5"]
[wai id="7"]
នៅព្រឹកថ្ងៃទី ១០ខែមីនា ឆ្នាំ២០២០នេះ ក្នុងពិធីចែកសញ្ញាបត្រដល់និស្សិតវិទ្យាស្ថានវ៉ាន់ដា សម្តេចនាយករដ្ឋមន្ត្រី ហ៊ុន សែន បានថ្លែងថា ក្នុងអំឡុងមានវិបត្តិវីរុសកូរ៉ូណាថ្មី COVID-19 កម្ពុជាបានត្រៀមថវិកាប្រមាណ ៨០០ ទៅ ២ពាន់លានដុល្លារ ដើម្បីស្រោចស្រង់សេដ្ឋកិច្ចជាតិ បើវិបត្តិនេះបន្តអូសបន្លាយរយៈពេលវែង។
សម្តេចបានបញ្ជាក់យ៉ាងដូច្នេះថា៖ «រាជរដ្ឋាភិបាលបម្រុងទុកថវិកាតាមសេណារីយ៉ូទីមួយ និងទីពីរ។ បើវិបត្តិអូសបន្លាយ ៦ខែ គឺត្រៀមថវិកាប្រមាណ ៨០០លានដុល្លារដើម្បីស្រោចស្រង់សេដ្ឋកិច្ច។ ប្រសិនបើវាកើតដល់មួយឆ្នាំ តើកំណើនសេដ្ឋកិច្ចរបស់យើងធ្លាក់នៅប៉ុណ្ណា ហើយយើងត្រូវប៉ះប៉ូវទំហំទឹកប្រាក់ប៉ុណ្ណា។ អ៊ីចឹង វាស្ថិតនៅចន្លោះ ពី ៨០០លាន ទៅ២ពាន់លានប៉ុណ្ណឹង ដែលយើងត្រៀមបម្រុង»។
យ៉ាងមិញ ក្រសួងសេដ្ឋកិច្ច និងហិរញ្ញវត្ថុ បានឲ្យដឹងតាមរយៈសេចក្តីប្រកាសព័ត៌មានដែល ចេញនៅថ្ងៃទី៤ ខែមីនាថា ក្រសួងបាននិងកំពុងសហការជាមួយក្រសួងសុខាភិបាល និងដៃគូពាក់ព័ន្ធ ដើម្បីរៀបចំក្របខណ្ឌរួម ជាវិធានការ និងយន្តការជាកញ្ចប់ ពាក់ព័ន្ធនឹងការការពារវីរុស កូវីដ-១៩ និងមេរោគឆ្លងនានាសម្រាប់រយៈពេល៦ខែ។
ក្រសួងបានបញ្ជាក់ថា ផ្នែកឯកជនបានស្នើសុំការផ្តល់ព័ត៌មាន វិធានការរបស់រដ្ឋាភិបាលលើការទប់ស្កាត់ការរីករាលដាលនៃវីរុស កូវីដ-១៩ ដូចជាការរៀបចំជាបទប្បញ្ញត្តិ និងគោលនយោបាយសម្រាប់ប្រយុទ្ធប្រឆាំងនឹងវីរុសនេះ ដើម្បីទប់ស្កាត់ការប៉ះពាល់ដល់សេដ្ឋកិច្ចកម្ពុជា។
ពាណិជ្ជកម្ម
គួរបញ្ជាក់ដែរថា ធនាគារពិភពលោកបានបញ្ចេញកញ្ចប់ជំនួយទំហំ១២ពាន់លានដុល្លារ ដើម្បីផ្តល់ការជួយជ្រោមជ្រែងប្រកបដោយប្រសិទ្ធភាព និងយ៉ាងឆាប់រហ័សដល់ប្រទេសដែលត្រូវការចាំបាច់ ក្នុងការទប់ទល់ជំងឺ កូវីដ-១៩ ជាពិសេសសម្រាប់ប្រទេសក្រីក្រ ដែលខ្វះសមត្ថភាពក្នុងការទប់ស្កាត់ការរីករាលដាលនៃជំងឺនេះ។
វីរុស កូវីដ-១៩ បានឆ្លងរាលដាលដល់ប្រទេសជិត៨០លើពិភពលោក ដែលអ្នកឆ្លងជំងឺនេះសរុបដល់ជាង ៩៦,០០០ នាក់។ ប្រទេសកូរ៉េខាងត្បូង អ៊ីតាលី និងអ៊ីរ៉ង់មានករណីឆ្លងច្រើនជាងគេបន្ទាប់ពីប្រទេសចិន៕
[wai id="6"]
