ខេត្តមណ្ឌលគិរី៖ ព្រះសង្ឃមួយអង្គ ទើបនឹងនិមន្ដមកពីបិណ្ឌបាត ស្រាប់តែសង្ឃទ្រុស្ដសីលមួយអង្គ ទើប នឹង និមន្ដមកថ្មី ស្ទុះទៅចាក់ប្រហារ បណ្ដាលឲ្យសុគតភ្លាមៗ បង្កឲ្យភ្ញាក់ផ្អើលដល់ពុទ្ធបរិស័ទជើងវត្ដ រត់មក ជួយ អន្ដរាគមន៍ និងឃាត់សង្ឃទ្រុស្ដសីល កាលពីវេលាម៉ោង៩ និង៣០នាទីព្រឹក ថ្ងៃទី២៤ ខែមីនា ឆ្នាំ២០២០ ស្ថិតក្នុងវត្តដេអេ ស្ថិតក្នុងឃុំពូជ្រៃ ស្រុកពេជ្រាដា។
ប្រភពព័ត៌មានពីកន្លែងកើតហេតុ បានឲ្យដឹងថា សង្ឃទ្រុស្ដសីល ជាជនបង្កនាម ធឿន នី ព្រះជន្ម៣៩វស្សា ជនជាតិខ្មែរ មានទីកន្លែងកំណើតនៅភូមិត្របែក ឃុំទឹកជ្រៅ ស្រុកតំបែរ ខេត្តកំពង់ចាម ហើយទីលំនៅបច្ចុប្បន្ន គង់នៅវត្តដេអេ ស្ថិតក្នុងភូមិចុងផាង ឃុំពូជ្រៃ ស្រុកពេជ្រាដា ខេត្តមណ្ឌលគិរី។ រីឯសង្ឃរងគ្រោះព្រះនាម ថ្លាង វុធ ព្រះជន្ម២៤វស្សា (ឆ្នាំ) ជនជាតិខ្មែរ មានស្រុកកំណើតនៅភូមិទឹកជ្រៅ ឃុំទឹកជ្រៅ ស្រុកតំបែរ ខេត្តកំពង់ចាម។ ទីលំនៅបច្ចុប្បន្នជាព្រះសង្ឃគង់នៅវត្តដេអេ ស្ថិតក្នុងភូមិចុងផាង ឃុំពូជ្រៃ ស្រុកពេជ្រាដា ខេត្តមណ្ឌលគិរី។
ប្រភពព័ត៌មានដដែល បានបន្ដថា មុនពេលកើតហេតុ សង្ឃរងគ្រោះបាននិមន្ដទៅបិណ្ឌបាត រហូតមកដល់វេលាខាងលើ ទើបនិមន្ដត្រឡប់មកដល់វត្ដវិញ ហើយរៀបចំចង្ហាន់ឲ្យព្រះសង្ឃដទៃទៀតឆាន់។ ប៉ុន្ដែមិនដឹងជាមានរឿងអ្វី ស្រាប់តែសង្ឃបង្កបានយកកាំបិតទៅចាក់ប្រហារលើសង្ឃរងគ្រោះ បណ្ដាលឲ្យសុគតភ្លាមតែម្ដង។ បន្ទាប់ចាក់ប្រហារទៅលើសង្ឃរងគ្រោះ រួចហើយ ជនបង្កក៏បានបន្ដធ្វើសកម្មភាពហិង្សាទៅលើសង្ឃដទៃទៀត តែត្រូវបរិស័ទចំណុះជើងវត្ដមកទាន់ ហើយស្រែកឆោឡោ បង្កឲ្យភ្ញាក់ផ្អើលពេញភូមិ និងរាយការណ៍ទៅសមត្ថកិច្ចចុះមកឃាត់ខ្លួនតែម្ដង។
ប្រភពព័ត៌មានពីអ្នកភូមិ បាន្យដឹងថា សង្ឃរងគ្រោះមានអត្ដចរិតស្លូតបូត មិនដែលបង្កបញ្ហាអ្វីឡើយ ហើយសង្ឃអង្គនេះ មានពុទ្ធបរិស័ទចូលចិត្ដច្រើន។ ប៉ុន្ដែព្រះអង្គមិនមានញាមប្រុសស្រី (ឪពុកម្ដាយ)។ ប៉ុន្ដែមុនពេលបួស គឺព្រះអង្គរស់នៅជាមួយនឹងជីដូន។ ដោយឡែកសង្ឃបង្ក ទើបនឹងចូលមកគង់ នៅក្នុងវត្តខាងលើនេះទេ តែមានចរិតមិនដូចសង្ឃដទៃ ហើយសង្ឃអង្គនោះទំនងជាបួសហើយមិនរៀនធម៌អាថ៌ទេ ដោយគ្រាន់តែបួសយកសាសនាជាខែល ទើបប្រព្រឹត្ដអំពើហិង្សាបែបនេះ។
បើតាមចាស់ព្រឹទ្ធាចារ្យ ដែលចេះដឹងវិន័យសង្ឃពុទ្ធសាសនា បានថ្លែងថា កាលណាបួសជាសង្ឃ គឺត្រូវលះបង់ចោលឲ្យអស់នូវទោស: (ការខឹងក្រោធ) មោហ: (ភាពល្ងង់ខ្លៅ) និងរាគ: (តម្រេក) ជាដើម។ ប៉ុន្ដែប្រសិនបើឈានដល់ការប្រើអំពើហិង្សា បណ្ដាលឲ្យមនុស្សស្លាប់បែបនេះ ត្រូវអាបត្ដិធ្ងន់ ពោលគឺបារាជិក។ អាបត្ដិនេះកាលណាត្រូវហើយ ត្រូវតែសឹកចេញ ហើយក៏មិនអាចបួសវិញជាភិក្ខុបានឡើយ។
មន្រ្ដីនគរបាលស្រុក បានឲ្យដឹងថា បើតាមការសន្និដ្ឋានបឋម ករណីនេះអាចបណ្ដាលមកពីការទំនាស់ពាក្យសម្ដីគ្នា ទើបឈានដល់អំពើហិង្សា រហូតមបង្កឲ្យមានអ្នកស្លាប់បែបនេះ។
ក្រោយពេលកើតហេតុ សង្ឃបង្កហេតុ ត្រូវបានសមត្ថកិច្ចចាប់ផ្សឹក ហើយនាំទៅកាន់អធិការដ្ឋាននគរបាលស្រុក ដើម្បីសាកសួរ និងចាត់ការតាមច្បាប់៕