បើយោងតាមការចុះផ្សាយរបស់ក្រសួងពាណិជ្ជកម្មនាព្រឹកថ្ងៃទី១មេសានេះ ប្រេងសាំងមានតម្លៃត្រឹម២,៣៥០រៀលក្នុងមួយលីត្រ ចាប់ពីថ្ងៃទី១ដល់១៥មេសា ឆ្នាំ២០២០។ ជាមួយនឹងគ្នានេះប្រេងម៉ាស៊ូត ក៏ធ្លាក់នៅត្រឹម២,៤៥០រៀលក្នុងមួយលីត្រ ផងដែរ។
សេចក្តីជូនដំណឹងក្រសួងពាណិជ្ជកម្មចុះថ្ងៃទី១ ខែមេសា ឆ្នាំ២០២០បញ្ជាក់ថា យោងប្រកាសអន្តរក្រសួងលេខ១៧២ពណ. អវឯ.ប្រក ចុះថ្ងៃទី២២ ខែមិថុនា ឆ្នាំ២០១៨ របស់ក្រសួងសេដ្ឋកិច្ច និងហិរញ្ញវត្ថុ ក្រសួងពាណិជ្ជកម្ម និងក្រសួងរ៉ែ និងថាមពល ស្តីពីការកំណត់រូបមន្តសម្រាប់កែសម្រួលថ្លៃលក់រាយប្រេងឥន្ធនៈនៅកម្ពុជា និង យោងលើការព្រមព្រៀង លើរូបមន្តកំណត់តម្លៃជាមួយក្រុមហ៊ុនប្រេងឥន្ធនៈដែលប្រកបអាជីវកម្មនៅកម្ពុជា និងយោងតាមការប្រែប្រួលនៃតម្លៃប្រេងឥន្ធនៈលើទីផ្សារក្នុងតំបន់ និងអន្តរជាតិ ។