[wai id="6"]
ជាថ្មីម្តងទៀត ប្រធានាធិបតីអាមេរិកលោក ដូណាល់ ត្រាំ បានអះអាងនៅថ្ងៃចន្ទសប្តាហ៍នេះ (ម៉ោងនៅវ៉ាស៊ីន តោន) ថា តាមពិតប្រទេសចិនអាចបញ្ឈប់វីរុសនេះ កុំឲ្យឆ្លងរាលដាលពាលពេញពិភពលោកបាន ប៉ុន្តែចិនមិនធ្វើ... រដ្ឋាភិបាលអាមេរិក កំពុងធ្វើការស៊ើបអង្កេតយ៉ាងច្បាស់លាស់ ចំពោះអ្វីដែលបានកើតឡើងនេះ។ នេះបើយោងតាមការចេញផ្សាយដោយសារ ព័ត៌មាន CNA នាព្រឹកថ្ងៃអង្គារ ទី២៨ ខែមេសា ឆ្នាំ២០២០។
កាលពីសប្តាហ៍មុនរដ្ឋមន្ត្រីក្រសួងការបរទេសសហរដ្ឋអាមេរិក លោក ម៉ៃក៍ ប៉ុមប៉េអូ (Mike Pompeo) ក៏បានវាយ ប្រហារចិនស្រដៀងគ្នានេះដែរ ដោយបានចោទទីក្រុងប៉េកាំងថា មិនបានរាយការណ៍ពីការផ្ទុះឡើងនៃជំងឺ COVID-19 ទាន់ពេលវេលា និងបានបិទបាំងការពិតជាដើម។
មិនតែប៉ុណ្ណោះ ប្រធានាធិបតីអាមេរិក លោកដូណាល់ ត្រាំ បានប្រកាសផ្អាកជំនួយហិរញ្ញវត្ថុដល់អង្គការសុខភាពពិភពលោក ដែលលោក ចោទប្រកាន់ថា ចាត់ចែងការងារមិនបានល្អ និងលំអៀងទៅរកចិន។ សម្រាប់អគ្គលេខាធិការអង្គការសហប្រជាជាតិ នៅក្នុងកាលៈទេសៈដែលពិភពលោកកំពុងប្រឈមនឹងជំងឺរាតត្បាត កូវីដ ១៩ នេះមិនមែនជាពេលវេលាដែលគេត្រូវផ្អាកជំនួយដល់អង្គការសុខភាពពិភពលោកនោះទេ។
ពាណិជ្ជកម្ម
លោកប្រធានាធិបតីត្រាំបាននិយាយថា រដ្ឋាភិបាលអាមេរិកនឹងធ្វើការសិក្សាអំពីអង្គការនោះមុនពេលសម្រេច ស្តីពីការផ្តល់ ថវិកានៅពេលអនាគតទៅឲ្យអង្គការសុខភាពពិភពលោក ដែលរដ្ឋាភិបាលក្រុងវ៉ាស៊ីនតោនបានផ្តល់ថវិកា ទាំងអស់រាប់ រយលានដុល្លារក្នុងមួយឆ្នាំៗ។
ពីរថ្ងៃជាប់ៗគ្នាដែលលោកប្រធានាធិបតី ដូណាល់ ត្រាំ បានវាយប្រហារអង្គការសុខភាពពិភពលោក (WHO) ហើយបានគំរាម កំហែងថវិការបស់អង្គការនោះមកពីសហរដ្ឋអាមេរិកដែលជាអ្នករួមវិភាគទានដ៏ធំបង្អស់មួយដល់ទីភ្នាក់ងារឯកទេសរបស់អង្គការសហប្រជាជាតិនោះ។
ជុំវិញការចោទប្រកាន់នេះ រដ្ឋាភិបាលទីក្រុងប៉េកាំង បានទាត់ចោលនូវការលើកឡើងដូច្នោះ និងបានចាត់ទុកការ លើកឡើង ទាំងអស់របស់ ថ្នាក់ដឹក នាំអាមេរិកថា អសីលធម៌ រើសអើង និងគ្មានភាពទទួលខុសត្រូវ។ បន្ថែមលើនេះ ចិនបានបដិសេធ នូវរាល់ការ ផ្សព្វផ្សាយ ព័ត៌មានទាំងឡាយណា ដែលថា ខ្លួនជាប្រភពដើមនៃជំងឺផ្លូវដង្ហើមថ្មីកូវីដ-១៩ និងថាទាំងនោះ គឺជាព័ត៌មានមិនពិត គ្មានភស្តុតាងបញ្ជាក់បង្ហាញត្រឹមត្រូវ។
ពាក់ព័ន្ធនឹងបញ្ហានេះ លោកស្រី Fadela Chaib អ្នកនាំពាក្យអង្គការសុខភាពពិភពលោក បាននិយាយនៅក្នុងសន្និសីទសារព័ត៌មាននាទីក្រុងហ្សឺណែវថា ដោយផ្អែកទៅតាមភស្តុតាង ដែលមាននៅក្នុងដៃ កូរ៉ូណាវីរុសគឺមានដើមកំណើតចេញមកពីសត្វ ហើយវាមិនមែនជាការបង្កើតឡើងដោយមនុស្ស ឬការលេចចេញពីមន្ទីរពិសោធន៍ណាមួយដែរ។ យ៉ាងណាក៏ដោយ លោកស្រីក៏មិនអាចច្បាស់មួយរយភាគរយដែរថា វាកើតចេញមកពីសត្វឬយ៉ាងណា ប៉ុន្តែកូរ៉ូណាវីរុសមានភាគរយច្រើនកើតចេញមកពីសត្វ ជាជាងមនុស្សបង្កើតវា។
ទន្ទឹមគ្នានេះ អ្នកនាំពាក្យ ក៏បានបន្តទៀតថា មិនទាន់មានការបង្ហាញឲ្យច្បាស់លាស់នៅឡើយទេ ថាតើកូរ៉ូណាវីរុសអាចឆ្លងកាត់របាំងពិសេសពីសត្វ ទៅមនុស្សដោយរបៀបណាទេ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters ។
គួរបញ្ជាក់ដែរថា ថ្ងៃអង្គារ ទី២៨ ខែមេសា ឆ្នាំ២០២០ នេះតែម្តង ចំនួនករណីឆ្លងជំងឺ COVID-19 នៅទូទាំងពិភពលោក បានកើនឡើង រហូតដល់ ៣,០៦៤,១៤១ករណីហើយ ដោយក្នុងនោះមនុស្សស្លាប់សរុបមានចំនួន ២១១,៥៣៣នាក់ និងជាសះស្បើយឡើងវិញ ៩២១,៥០៩នាក់។
យោងតាមទិន្នន័យពីគេហទ័ពអន្តរជាតិ Worldometer សហរដ្ឋអាមេរិក មានតួលេខអ្នកឆ្លងលើស ១លាននាក់ហើយ សម្រាប់ករណីឆ្លងជំងឺ COVID-19 សុរបនៅទូទាំងប្រទេសមហាអំណាចមួយនេះ៕
[wai id="5"]