[wai id="6"]
យោងតាមរបាយការណ៍ របស់អគ្គស្នងការដ្ឋាននគរបាលជាតិឲ្យដឹងថា នៅថ្ងៃទី០៤ ខែឧសភា ឆ្នាំ២០២០ មានករណីគ្រោះថ្នាក់ចរាចរណ៍ នៅទូទាំងប្រទេសកើតឡើងចំនួន២លើក មិនបណ្ដាល ឲ្យមានមនុស្សស្លាប់នោះទេ មានតែអ្នករបួសធ្ងន់ស្រាល៤នាក់។
ប្រភពព័ត៌មានដដែលបញ្ជាក់ថា មូលហេតុដែលបណ្ដាលឲ្យកើត មានគ្រោះថ្នាក់ចរាចរណ៍រួមមាន៖ ល្បឿន និងបត់មិនប្រយ័ត្ន។ គួរកត់សម្គាល់ថា ក្នុងរយៈពេលប៉ុន្មានថ្ងៃចុងក្រោយនេះ ក្រោយពីមានការអនុវត្តន៍ការរឹតបន្តឹងច្បាប់ ចរាចរណ៍ ដោយធ្វើការផាកពិន័យតាមអនុក្រឹត្យថ្មី បានធ្វើឲ្យគ្រោះថ្នាក់ចរាចរណ៍ធ្លាក់ចុះច្រើន។
ពាណិជ្ជកម្ម
គួររម្លឹកដែរថា ក្នុងរបាយការណ៍របស់អគ្គស្នងការដ្ឋាននគរបាលជាតិ ចេញផ្សាយនៅដើមខែមករាកន្លងទៅ មនុស្សចំនួន១,៩៨១នាក់ស្លាប់នៅក្នុងគ្រោះថ្នាក់ចរាចរណ៍ កើនឡើង២២០នាក់ បើធៀបនឹងឆ្នាំ២០១៨ ដែលមានមនុស្សស្លាប់ចំនួន១,៧៦១នាក់។ ក្នុងករណីគ្រោះថ្នាក់ចរាចរណ៍សរុបចំនួន៤,១២១លើក អ្នករបួសធ្ងន់មានចំនួន៣,៩១៩នាក់ និងរបួសស្រាល២,២២២នាក់។ ក្នុងនោះ រាជធានីភ្នំពេញមានអ្នកស្លាប់ដោយគ្រោះថ្នាក់ចរាចរណ៍ច្រើនជាងគេ ដែលមានប្រមាណ៣៤៨នាក់។
ជាមួយគ្នានោះដែរ ដោយរដ្ឋាភិបាលបានដាក់ចេញយុទ្ធសាស្ត្រសំខាន់ៗមានចំនួន៨ចំណុច ដូចជាការឧបត្ថម្ភហិរញ្ញវត្ថុដល់ការអនុវត្តផែនការសកម្មភាពសុវត្ថិភាពចរាចរណ៍ ការដោះស្រាយផ្នែកវិស្វកម្មផ្លូវថ្នល់ ការពង្រឹងសុវត្ថិភាពក្នុងការដឹកជញ្ជូន ការអប់រំផ្សព្វផ្សាយ និងផាកពិន័យពាក់ព័ន្ធនឹងការពាក់មួកសុវត្ថិភាព ល្បឿនបើកបរ ការបើកបរក្រោមឥទ្ធិពលគ្រឿងស្រវឹង ការផ្តល់សេវាសង្គ្រោះបន្ទាន់ ការរឹតបន្តឹងការអនុវត្តច្បាប់ ការបណ្តុះបណ្តាលប្រព័ន្ធប្រឡងយកបណ្ណបើកបរ និងការវាយតម្លៃសុវត្ថិភាពចរាចរណ៍ក្នុងការដឹកជញ្ជូនជាដើម។
[wai id="5"]