[wai id="6"]
លោក ម៉ៃ តុលា អតីតអគ្គលេខាធិការរងសហព័ន្ធកីឡាបាល់ទាត់កម្ពុជា ត្រូវបានឃាត់ខ្លួនហើយ ដោយអង្គភាពប្រឆាំងអំពើពុករលួយ សហការជាមួយកងរាជអាវុធហត្ថលើផ្ទៃប្រទេសទាក់ទងទៅនឹងអំពើពុករលួយនៃការកិបកេងថវិកា ក្នុងការរៀបចំប្រកួតបាល់ទាត់ Tigeger Street Football តាំងពីឆ្នាំ២០១៣ រហូតមកដល់ឆ្នាំ២០១៩ នេះបើតាមការបញ្ជាក់ពីមន្ត្រីជាន់ខ្ពស់កងរាជអាវុធហត្ថ ហើយត្រូវបានបញ្ជូនទៅសាកសួរនៅអង្គភាពប្រឆាំងអំពើពុករលួយមុននឹងបញ្ជូនទៅកាន់តុលាការ។
ទំហំទឹកប្រាក់នៅក្នុងអំពើឃុបឃិតគ្នាជាប្រព័ន្ធ ត្រូវបានគណៈកម្មាធិការប្រតិបត្តិរកឃើញមានទឹកប្រាក់ប្រមាណ ៥៩៧៣៦ដុល្លារ គិតចាប់តាំងពីឆ្នាំ២០១៣ ដល់ឆ្នាំ២០១៩ ហើយនេះមិនរាប់បញ្ចូលព្រឹត្តិការណ៍ប្រកួតធំៗ ជាច្រើន នាពេលកន្លងនោះឡើយ។
ពាណិជ្ជកម្ម
គួរបញ្ជាក់ដែរថា សហព័ន្ធកីឡាបាល់ទាត់កម្ពុជា នៅថ្ងៃទី៦ ឧសភា បានចេញសេចក្តីប្រកាសព័ត៌មានមួយ ដោយសម្រេចពិន័យមន្ត្រី៤រូប មិនឲ្យពាក់ព័ន្ធវិស័យកីឡាមួយជីវិត ពាក់ព័ន្ធការកិបកេងថវិកាជាង៥ម៉ឺនដុល្លារ ដែលកម្មវិធីប្រកួតបាល់ទាត់ Tiger Street ផ្តល់ឲ្យសហព័ន្ធ(គិតចាប់ពីឆ្នាំ២០១៥-២០១៩)។
មន្ត្រីទាំង៤រូបនោះ រួមមានលោក ម៉ៃ តុលា អតីតអគ្គលេខាធិការរងសហព័ន្ធ, លោក ឆាំង ពិសិដ្ឋ អតីតប្រធានការិយាល័យរៀបចំការប្រកួត, លោក ទុយ វិច្ឆិកា អតីតប្រធានការិយាល័យអាជ្ញាកណ្តាល និងលោក គល់ សុភារម្យ អតីតប្រធានការិយាល័យរដ្ឋបាល៕
[wai id="5"]
