[wai id="6"]
នៅថ្ងៃទី១៥ ខែឧសភា ឆ្នាំ២០២០នេះ ក្រសួងសុខាភិបាល បានចេញសេចក្តីប្រកាសថា មិនមានករណី ឆ្លងជំងឺ កូវីដ១៩ ហើយក៏ពុំមានករណីជាសះស្បើយដែរ ខណៈអ្នកជំងឺកូវីដ១៩ បានជាសះស្បើយសរុបចំនួន១២១នាក់។
ចំណែកអ្នកកំពុងសម្រាកព្យាបាលជំងឺកូវីដសល់តែម្នាក់ប៉ុណ្ណោះ នៃអ្នកឆ្លងសរុប១២២នាក់។ បើគិតត្រឹមព្រឹកថ្ងៃទី១៥ ខែឧសភា ឆ្នាំ២០២០នេះ។
រយៈពេល៣២ថ្ងៃហើយ ដែលកម្ពុជាគ្មានករណីឆ្លងថ្មីនៃជំងឺកូវីដ-១៩(COVID-19) ខណៈនៅសល់អ្នកជំងឺត្រឹមតែ១នាក់ប៉ុណ្ណោះ កំពុងសម្រាកព្យាបាលនៅមន្ទីរពេទ្យមិត្តភាពកម្ពុជា-សូវៀត។ ថ្វីដ្បិតក្នុងរយៈពេលកម្ពុជាគ្មានករណីឆ្លងថ្មីនៃជំងឺនេះ ប៉ុន្តែក្រសួងសុខាភិបាលនៅតែព្រមានដល់ពលរដ្ឋជានិច្ចឱ្យប្រុងប្រយ័ត្នខ្ពស់ចំពោះជំងឺនេះ។
លោកស្រីឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល ធ្លាប់បានថ្លែងនៅក្នុងសេចក្តីប្រកាស នៅកាលពីថ្ងៃទី ១៤ ឧសភានេះថា បើទោះបីជាប្រទេសកម្ពុជា មិនមានរកឃើញករណីជំងឺកូវីដ-១៩ ថ្មីក្នុងរយៈពេលជាងមួយខែកន្លងមកនេះក្តី ក៏ប៉ុន្តែក្រសួងសុខាភិបាលនៅតែក្រើនរម្លឹកម្តងហើយម្តងទៀតដល់ពលរដ្ឋទាំងអស់ មិនត្រូវមានការធ្វេសប្រហែសនោះឡើយ ដូច្នេះទាមទារឲ្យបុគ្គលគ្រប់រូបត្រូវមានការប្រុងប្រយ័ត្ន និងអនុវត្តវិធានការការពារការចម្លងឲ្យបានជាប់ជានិច្ច ដោយត្រូវចេះកែប្រែទម្លាប់ និងឥរិយាបទនៃការរស់នៅរបស់ខ្លួន។
ពាណិជ្ជកម្ម
អ្នកនាំពាក្យក្រសួងសុខាភិបាលរូបនេះ បានបញ្ជាក់ទៀតថា ទម្លាប់និងឥរិយាបទនៃការរស់នៅរបស់ប្រជាពលរដ្ឋ ដែលត្រូវតែកែប្រែឲ្យស្របទៅតាម «សភាពធម្មតាតាមបែបគន្លងថ្មី (New Normal Life) ក្នុងបរិបទប្រយុទ្ធនឹងជំងឺកូវីដ-១៩» ជាចាំបាច់នោះ រួមមាន៖ ការប្រកាន់យកនូវការអនុវត្តអនាម័យដៃស្អាត ពាក់ម៉ាស់ (ក្នុងករណីចាំបាច់) ឬប្រើក្រម៉ា កន្សែង ឬក្រដាសជូតមាត់ ខ្ទប់មាត់ពេលមានការក្អក ឬកណ្តាស់ បន្តអនុវត្ត៍គម្លាតសុវត្ថិភាព និងគម្លាតសុវត្ថិភាពបុគ្គល មិនត្រូវមានការជួបជុំ ឬរៀបចំពិធិណាមួយដែលមានគ្នាច្រើនកុះករពេក ដូចជាការជួបជុំផឹកស៊ីដែលមានគ្នាច្រើន ឬការជួបជុំតាមបែបសាសនាជាដើម ។
ដោយឡែក សម្រាប់ម្ចាស់ភោជនីយដ្ឋាន និងអាហារដ្ឋាន ព្រមទាំងកន្លែងលក់ដូរផ្សេងៗ ត្រូវតែបន្តអនុវត្តន៍វិធានការការពារឲ្យទៅតាមបែបនៃការរស់នៅ «សភាពធម្មតាបែបគន្លងថ្មី ក្នុងបរិបទប្រយុទ្ធនឹងជំងឺកូវីដ-១៩» នៅកម្ពុជា ដូចចំណុចរៀបរាប់ខាងលើ និងអនុវត្តន៍ប្រកបដោយការទទួលខុសត្រូវខ្ពស់ និងត្រូវធានាថា «ទីតាំងធុរកិច្ចរបស់ខ្លួនមិនត្រូវក្លាយជាទីកន្លែងចម្លងវីរុសកូវីដ-១៩ ដល់អតិថិជន ឬអ្នកបម្រើការនៅទីនោះឡើយ ។
គួរបញ្ជាក់ដែរថា នាព្រឹកថ្ងៃទី១៥ខែឧសភា ២០២០ នៅកិច្ចប្រជុំពេញអង្គគណៈរដ្ឋមន្ត្រី ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនា បតី តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានណែនាំដល់អាជ្ញាធរ ឱ្យចុះពិនិត្យភោជនីយដ្ឋានទាំង ឡាយណា បើភោជនីយដ្ឋានណាមិនអនុវត្តន៍តាមវិធានអនាម័យក្នុងការប្រយុទ្ធប្រឆាំងជំងឺកូវីដ១៩ ឬទប់ស្កាត់មិនឱ្យជំងឺ នេះរីករាលដាលទេនោះ ត្រូវផ្អាកជាបណ្តោះអាសន្នផងដែរ។
[wai id="5"]
