កាលពីពេលថ្មីៗនេះ នគរបាលមន្ទីរប្រឆាំងគ្រឿងញៀនក្រសួងមហាផ្ទៃ នៅចំណុចស្ថានីយសាំង សូគីម៉ិច សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ បានចាប់ខ្លួន លោក ឈុន សុមេធា នាយការិយាល័យប្រឆាំង បទល្មើសគ្រឿងញៀន នៃកងរាជអាវុធហត្ថ ខេត្តតាកែវ និងបក្ខពួកពាក់ព័ន្ធករណីជួញដូរគ្រឿងញៀន ជាង២គីឡូក្រាម។
លោក ឈុន សុមេធា ប្រធានការិយាល័យប្រឆាំងគ្រឿងញៀននៃទីបញ្ជាការដ្ឋានកងរាជអាវុធហត្ថខេត្តតាកែវ និងគ្នីគ្នាម្នាក់ទៀត ដែលសង្ស័យថា ពាក់់ព័ន្ធនឹងគ្រឿងញៀន២គីឡូក្រាម និងកាំភ្លើងខ្លី២ដើម ត្រូវបានបញ្ជូនទៅកាន់អយ្យការអមសាលាដំបូងរាជធានីភ្នំពេញ នៅរសៀលថ្ងៃទី៨ ខែមិថុនានេះ។ នេះបើតាមលោក គុជ គឹមឡុង ព្រះរាជអាជ្ញារងនិងជាអ្នកនាំពាក្យអយ្យការអមសាលាដំបូងរាជរាជធានីភ្នំពេញ ។
គួរបញ្ជាក់ដែរថា បើតាមរបាយការណ៍ស្នងការខេត្ត ការឆែកឆេ នៅផ្ទះរបស់ជនសង្ស័យ ឈុន សុមេធា នៅភូមិកំពង់ហ្លួង ឃុំអង្គរបូរីស្រុកអង្គរបូរី ខេត្តតាកែវ ដកហូតវត្ថុតាងបាន អាវុធខ្លីចំនួន០២ដើម (ប្រើហ្គាស់) និងជញ្ជីងថ្លឹង ថ្នាំញៀន ចំនួន០១គ្រឿង និងរុក្ខជាតិញៀន (កញ្ឆា) ក្រៀមចំនួន០២ស្បោង និងការឆែកឆេ នៅបន្ទប់ជួលរបស់ឈ្មោះ កេន ចាន់រី ភេទស្រី នៅភូមិអង្គតាកុប ឃុំលាយបូរ ស្រុកត្រាំកក់ ខេត្តតាកែវ ដកហូតវត្ថុតាងបាន ម៉ាស៊ីនកាមេរ៉ាសុវត្ថិភាពចំនួន០១គ្រឿង ស្លាកលេខម៉ូតូចំនួន០៣គ្រឿង និងកាតគ្រីម៉ូតូចំនួន០២សន្លឹក ៕
[wai id="5"]
