[wai id="8"]
[wai id="7"]
ស្របពេលទៅនឹងកិច្ចដំណើរការ នៃគម្រោងអភិវឌ្ឍន៍សាងសង់ព្រលានយន្តហោះអន្តរជាតិថ្មីនៅក្នុងទឹកដីស្រុកកណ្តាលស្ទឹង ខេត្តកណ្តាល ដែលស្ថិតនៅតំបន់ភាគខាងត្បូងក្រុងតាខ្មៅ ដោយមានការសាទរ និងគាំទ្រយ៉ាងពេញទំហឹងពីសំណាក់រាជរដ្ឋាភិបាលផងដែរនោះ បានធ្វើឱ្យតម្លៃដីដែលស្ថិតនៅក្នុងតំបន់ផ្ទាល់ ក៏ដូចជាតំបន់ជិតខាងជុំវិញទីតាំងគម្រោងបង្កើតព្រលានយន្តហោះ មានការឡើងថ្លៃយ៉ាងពុះកញ្ជ្រោលហួសពីការស្មាន ខណៈដែលពេលនេះមានឈ្មួញជាច្រើនកំពុងប្រជែងគ្នាសម្រុកទិញយ៉ាងមមាញឹកដោយសម្លឹងឃើញពីភាពវិជ្ជមានក្នុងអត្រាខ្ពស់ដែលអាចទទួលបានចំណេញកប់ក្តោងក្នុងពេលដ៏ខ្លីខាងមុខនេះ ។
លោក ស៊ីន ចាន់សិរីវុត្ថា អគ្គនាយករងបច្ចេកទេស និងជាអ្នកនាំពាក្យរដ្ឋលេខាធិការដ្ឋាន អាកាសចរណ៍ស៊ីវិល បានថ្លែងថា ការសាងសង់អាកាសយានដ្ឋាន អន្តរជាតិភ្នំពេញថ្មី នៅលើទឹកដីខេត្តកណ្តាល និងតាកែវ សម្រេចបានជាង ៣០% ហើយ ប៉ុន្តែការសាងសង់នៅតែបន្តដំណើរការ បើទោះបីមានភាពយឺតយ៉ាវាបន្តិចបន្តួច ដោយសារការរីករាលដាល ជាសកលនៃកូវីដ១៩ នៅលើពិភពលោក ក៏ដូចជាកម្ពុជាក៏ដោយ ។
ពាណិជ្ជកម្ម
បើតាមក្រុមហ៊ុនអចលនទ្រព្យ NARO Real-Estate ធ្លាប់បានធ្វើការវាយតម្លៃប្រាប់ថាតម្លៃដីធ្លីក្បែរតំបន់នោះចាប់ផ្តើមឡើងថ្លៃខ្លាំងនៅតាមបណ្ដោយផ្លូវជាតិលេខ២ ដែលតម្លៃដីធ្លី មុនគម្រោងព្រលានយន្តហោះមកបោះទីតាំងម្តុំនោះ ជាមធ្យមមានតម្លៃ ៥០ដុល្លារប៉ុណ្ណោះក្នុងមួយម៉ែត្រការ៉េ ប៉ុន្តែឥឡូវបានកើនឡើងរហូតដល់ ៣០ ទៅ៤០ភាគរយហើយ។
រីឯដី្លធ្លីស្ថិតក្នុងតំបន់អភិវឌ្ឍន៍វិញ ក៏បានកើនឡើងតម្លៃពី ២ ទៅ ៣ដងឯណោះ។ខណៈដែលភាគច្រើនដីធ្លីមួយចំនួនធំ នៅតំបន់នោះ ត្រូវបានទិញអស់ តាំងពីមុន គម្រោងព្រលានយន្តហោះថ្មីបានប្រកាសមកម្ល៉េះ។
លោក គង់ សោភណ្ឌ អភិបាលខេត្តកណ្តាលធ្លាប់បានឱ្យដឹងកន្លងមកនេះថា នាពេលបច្ចុប្បន្ននេះ មានអ្នករកស៊ីក្នុងវិស័យ អចលនទ្រព្យជាច្រើនបាន និងកំពុងផ្តោតលើការចាប់អារម្មណ៍យ៉ាងខ្លាំង លើការវិនិយោគលើដីធ្លី នៅតំបន់ព្រលានយន្តហោះ អន្តរជាតិភ្នំពេញនៅខេត្តកណ្តាល។លោកថា អ្នកវិនិយោគលើវិស័យអចលនទ្រព្យទាំងនោះ រួមមាន ទាំងវិនិយោគលើវិស័យ សណ្ឋាគារ ផ្ទះសំណាក់ លំនៅឋាន បុរី និង គម្រោងធំៗផ្សេងទៀត ដែលធ្វើឱ្យតម្លៃដីធ្លីនៅក្នុងតំបន់នោះ កាន់តែមានតម្លៃខ្ពស់ ហើយផ្តល់ជីវភាពធូធារដល់ប្រជាពលរដ្ឋនៅក្នុងមូលដ្ឋានថែមទៀតផងដែរ។
គួររម្លឹកដែរថាក្នុងសន្និសីទសារព័ត៌មាន ស្ដីពី «វឌ្ឍនភាព និងទិសដៅការងារបន្ដរបស់ រដ្ឋលេខាធិការដ្ឋានអាកាសចរស៊ីវិល» នៅថ្ងៃទី១៦ មេសានេះ លោក ស៊ីន ចាន់សិរីវុត្ថា បានបញ្ជាក់ថា «ការអភិវឌ្ឍន៍អាកាសយានដ្ឋានភ្នំពេញថ្មី នៅតែដំណើរការទេ ប៉ុន្ដែមានផ្ដល់ប៉ះពាល់ខ្លះដែរ ពីកូវីដ ដោយសារតែអ្នកជំនាញការចិនមួយចំនួន ក្នុងនោះភាគច្រើនជាក្រុមហ៊ុនចិន ចឹងដោយសារអ្នកជំនាញមួយចំនួនគាត់ទៅស្រុក ហើយពិបាកមកវិញ ចឹងមានការយឺតយ៉ាវ ប៉ុន្ដែដំណើរការនៅតែដំណើរការ ធម្មតា ប៉ុន្ដែយឺតជាងមុនមានជំងឺកូវីដ ប៉ុន្ដែនៅបន្ដរហូត ចឹងភ្នំពេញហ្នឹងដំណើរការបានប្រហែលជាង ៣០% ហើយ»។
លោកបន្តថា អាកាសយានដ្ឋានអន្តរជាតិភ្នំពេញថ្មី បែងចែកជា២ ដំណាក់កាល គឺដំណាក់កាលទី១ ព្យាករណ៍ថា នៅឆ្នាំ២០៣០ នឹងទទួលបានអ្នកដំណើរ ១៣លាននាក់ និងដំណាក់កាលទី២ នៅឆ្នាំ២០៥០ នឹងទទួលបានអ្នកដំណើរ ៣០លាននាក់ ៕
[wai id="5"]
