[wai id="8"]
[wai id="7"]
ជារឿងដ៏ហួសចិត្ត និងសហាវឃោឃៅដែលមហាជនស្ទើរទូទាំងប្រទេសមានក្ដីអាណិតអាសូរជាពន់ពេកលើកុមារីអាយុ ៥ ឆ្នាំ ត្រូវស្ត្រីម្នាក់យកកាំបិតអាមុខ ច្រមុះ និងដៃឱ្យរងរបួសយ៉ាងធ្ងន់ធ្ងរ ។ អំពើដ៏ព្រៃផ្សៃនេះបានកើតឡើង ព្រោះគំនុំគុំកួនរបស់ ស្ត្រីឈ្មោះ លីវ ប៊ុនធឿន អាយុ៤៣ឆ្នាំ ដែលខឹងក្មេងស្រីធ្វើឱ្យកូនប្រុសខ្លួនរបួសត្រង់ក្បាលបន្តិចបន្តួច ។ ក្រោយរំលងបាន ២ ថ្ងៃ ក្រោយក្មេងៗឈ្លោះគ្នា ស្រាប់តែស្ត្រីរូបនេះ បានចាប់ក្មេងស្រីមកអារ មុខ និងច្រមុះ ដៃ ធ្វើឱ្យឈាមស្រោចពេញខ្លួន គួរឱ្យខ្លោចផ្សារបំផុត ។
ពាណិជ្ជកម្ម
ហេតុការណ៍នេះបានកើតឡើងកាលពីវេលាម៉ោង៣៖១៥នាទីរសៀល ថ្ងៃទី១៦ ខែកក្កដា ឆ្នាំ២០២០ នៅក្នុងបុរីភពថ្មីឈូកវ៉ា២ ក្នុងភូមិតិក្ខប្បញ្ញោ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។
ស្ត្រីដៃដល់ខាងលើឈ្មោះ លីវ ប៊ុនធឿន អាយុ៤៣ឆ្នាំ មានទីលំនៅផ្ទះលេខ៦ ផ្លូវលេខ២៦ បុរីភពថ្មីឈូកវ៉ា២ ក្នុងភូមិតិក្ខប្បញ្ញោ សង្កាត់សំរោងក្រោម។ ក្រោយពេលចាប់ខ្លួនស្ត្រីនោះបាននិយាយថា គាត់ខឹងខ្លាំងណាស់ដេក អត់លក់២យប់ហើយ ដោយសារតែក្មេងស្រីខាងលើ ធ្វើឲ្យកូនគាត់ចេញឈាម ហើយត្រូវដឹងថា កូនគាត់ធំឡើងជាតារាផង ដូច្នេះគាត់សុំត្រឹមតែឲ្យក្មេងស្រីនេះ ចេញឈាមវិញដូចជាកូនគាត់វិញប៉ុណ្ណោះ។
ស្ត្រីខាងលើបាននិយាយទៀតថា នៅរសៀលថ្ងៃកើតហេតុគាត់បានទៅទិញកូនកាំបិត រួចក៏ចាប់ក្មេងស្រីនោះអារ និងឆូតមុខ ច្រមុះ និងដៃព្រមទាំងក តែម្ដងនេះ គឺជាការតបស្នង ហើយអ្នកដាំផ្លែអ្វី គឺបានផលនោះអីចឹងហើយ។
រីឯក្មេងស្រីរងគ្រោះឈ្មោះ ឡាស់ម៉ាវី លីយ៉ា អាយុ៥ឆ្នាំ រងរបួសផ្ទៃមុខ ច្រមុះ ក និងដៃ រស់នៅផ្ទះលេខ១៨ ផ្លូវលេខ២០ បុរីភពថ្មីឈូកវ៉ា២ ភូមិតិក្ខប្បញ្ញោ សង្កាត់សំរោងក្រោម។
អ្នកភូមិបាននិយាយថា រឿងហេតុនេះផ្ដើមពីការកាន់ជើងកូនខ្លាំងពេក និងខ្វះការពិចារណាវែងឆ្ងាយ ដោយកាលពីថ្ងៃទី១៤ ខែកក្កដា ឆ្នាំ២០២០ កូនប្រុសរបស់ស្ត្រីដែលជាជនដៃដល់ខាងលើបាន រើសដុំថ្មគប់ដាក់ក្មេងស្រីរងគ្រោះ ហើយក៏ត្រូវក្មេង ស្រីរងគ្រោះគប់តបតវិញ បណ្ដាលឲ្យត្រូវក្បាលរងរបួសបែករយះដេរ២ថ្នេរ ដោយពេលនោះម្ដាយក្មេងស្រីរូបនោះ ក៏បានជួយបញ្ជូនទៅកាន់មន្ទីរពេទ្យផងដែរ។
ក្រោយទទួលបានដំណឹងនេះ ឧកញ៉ា ឌួង ឆាយ និងភរិយា ក៏បានទៅសួរសុខទុក្ខក្មេងស្រីដ៏គួរឲ្យអាណិតខ្លោចចិត្តម្នាក់នេះផ្ទាល់ ដល់មន្ទីរពេទ្យ ហើយក៏បានជូនថវិកា ១០០០ដុល្លារ ព្រមទាំងសន្យាថានឹងនាំក្មេងស្រីដ៏គួរឲ្យអាណិតនេះទៅព្យាបាល អ៊ុតមុខ នៅក្រៅប្រទេសផងដែរ ៕
[wai id="5"]
