[wai id="8"]
[wai id="7"]
ធនាគារពិភពលោក បានប្រកាសបញ្ចេញកញ្ចប់ថវិកា ១២ពាន់លានដុល្លារ ដើម្បី ធានាថា ប្រទេសក្រីក្រ អាចទទួលបានវ៉ាក់សាំងប្រឆាំងកូវីដ ដ៏លឿនបំផុត ពោលគឺនៅពេលគេរកឃើញ និងផលិតបានភ្លាម វ៉ាក់សាំង ប្រឆាំងជំងឺកូវីដ។ ១២ពាន់លានដុល្លារ ជាផ្នែកមួយ នៃកញ្ចប់ថវិកា សរុប ១៦០ពាន់លានដុល្លារ ដែលធនាគារពិភពលោក បានប្រកាសកន្លងមក សម្រាប់ ជួយប្រទេសក្រីក្រ ក្នុងការប្រយុទ្ធប្រឆាំងនឹងជំងឺកូវីដ រហូតដល់ ពាក់កណ្តាលឆ្នាំ ២០២១។
ក្នុងសេចក្តីថ្លែងការណ៍ថ្ងៃទី១៣ ខែតុលា WB បានលើកឡើងថា កម្មវិធីហិរញ្ញវត្ថុនេះរួមមានការគាំទ្របច្ចេកទេសដល់ប្រទេសកំពុងអភិវឌ្ឍដើម្បីរៀបចំការចែកចាយវ៉ាក់សាំងទ្រង់ទ្រាយធំ ហើយវាក៏ការផ្ដល់សញ្ញាទៅកាន់ក្រុមហ៊ុនផលិតវ៉ាក់សាំង។
ពាណិជ្ជកម្ម
«កញ្ចប់ថវិកានេះ ជាសញ្ញាប្រាប់ទៅអ្នកស្រាវជ្រាវ និងឧស្សាហម្មឱសថថា ប្រជាជនក្នុងប្រទេសកំពុងអភិវឌ្ឍ ក៏ត្រូវការវ៉ាក់សាំងដែលមានសុវត្ថិភាព និងប្រសិទ្ធភាពដែរ»។ នេះជាការបញ្ជាក់ក្នុងសេចក្តីថ្លែងការណ៍របស់ WB ។ ស្ថាប័នផ្តល់ប្រាក់កម្ចីពិភពលោកមួយនេះបន្ថែមថា ទឹកប្រាក់១២ពាន់លានដុល្លារនេះ នឹងផ្តល់ជាការគាំទ្រផ្នែកបច្ចេកទេស និងហិរញ្ញវត្ថុដល់ប្រទេសកំពុងអភិវឌ្ឍដើម្បីអាចរៀបចំខ្លួនក្នុងការចែកចាយវ៉ាក់សាំងទ្រង់ទ្រាយធំ ដោយមានការសម្របសម្រួលជាមួយដៃគូអន្តរជាតិ។
លោក David Malpass នាយក WB លើកឡើងថា ការទទួលបានវ៉ាក់សាំង ក៏ដូចជាពង្រឹងការផ្តល់វ៉ាក់សាំងជាគន្លឹះក្នុងការកែប្រែស្ថានភាពនៃជំងឺឆ្លង និងជួយប្រទេសកំពុងអភិវឌ្ឍឲ្យមានសមត្ថភាពស្តាសេដ្ឋកិច្ច និងសារពើពន្ធឡើងវិញ។ បើទោះបីជាវ៉ាក់សាំង COVID-19 ពុំទាន់មានវត្តមានក្នុងទីផ្សារ តែលោក Malpass និយាយក្នុងបទសម្ភាសជាមួយកាសែតបារាំង Le Figaro ថា ការរៀបចំថវិកា ជារឿងចាំបាច់ណាស់ ដោយសារតែការចែកចាយវ៉ាក់សាំងមានភាពស្មុគស្មាញ។
គួររម្លឹកដែរថា COVID-19 ដែលត្រូវបានអង្គការសុខភាពពិភពលោក WHO ប្រកាសចាត់ទុកជា «ជំងឺរាតត្បាតជាសកល» បានវាយលុកចូលដល់ប្រទេស និងដែនដីសរុបចំនួន ២១៥ ហើយនៅទូទាំងសកលលោក ពោលវាបានរីកសាយភាយ ពាសពេញទ្វីបទាំងអស់លើភពផែនដី លើកលែងតែទ្វីបទឹកកកអង់តាក់ទិកមួយប៉ុណ្ណោះ។
ជំងឺរាតត្បាតដ៏កាចសាហាវមួយនេះ វាបានចម្លងទៅមនុស្សសរុបចំនួន ៣៨,៤៣២,១៨២នាក់ ដែលក្នុងនោះអ្នកជំងឺចំនួន ១,០៩២,០៤៤នាក់បានស្លាប់បាត់បង់ជីវិត និង ២៨,៨៨៧,៧៧៨នាក់ផ្សេងទៀត ត្រូវបានព្យាបាលឲ្យជាសះស្បើយឡើងវិញ នៅទូទាំងសកលលោក។ ទោះជាយ៉ាងណា បណ្តាប្រទេសដែលមានអ្នកឆ្លងចាប់ពី ១០០ករណី គឺមាន ១៩៥ប្រទេស និងដែនដី ៕
