[wai id="8"]
[wai id="7"]
កាលពីប៉ុន្មានសប្តាហ៍មុនស្ដ្រីជនជាតិចិនម្នាក់ ដែលដើរស្រែកយំប្រាប់អ្នកសារព័ត៌មានថា ខ្លួនត្រូវបានចោរឆក់កាបូប គឺជាព័ត៌មានមិនពិត ព្រោះសាមីខ្លួនប្រឌិតរឿងឡើង ដើម្បីបានលុយត្រឡប់ទៅប្រទេសចិនវិញ។
តាមការបកស្រាយរបស់ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ ទាក់ទងជាមួយករណី ស្ដ្រីជនជាតិចិនម្នាក់ ដែលស្រែកទ្រហោយំនៅតាមផ្លូវសាធារណៈ ដែលមានសារព័ត៌មានមួយចំនួនបានផ្សាយថា នាងត្រូវបានចោរឆក់កាលពីថ្ងៃទី០៩ ខែតុលា ឆ្នាំ២០២០នោះ ជាព័ត៌មានដែលសាម៉ីខ្លួនប្រឌិត។
ពាណិជ្ជកម្ម
បន្ទាប់ពីធ្វើការសហការស្រាវជ្រាវ រវាងអធិការដ្ឋាននគរបាលខណ្ឌដូនពេញ ប៉ុស្តិ៍នគរបាលរដ្ឋបាលចតុមុខ ការិយាល័យអនុវត្ត នីតិវិធី នៃផែនការងារ អន្តោប្រវេសន៍ ជាមួយនាយកដ្ឋាននគរបាល ព្រហ្មទណ្ឌ អស់រយៈពេលប៉ុន្មានថ្ងៃកន្លងមកនេះ នៅព្រឹកថ្ងៃទី២៧ ខែតុលា ឆ្នាំ២០២០ សមត្ថកិច្ចរកឃើញ ស្ត្រីជនជាតិចិនឈ្មោះ ZHAO YUNYAN ហើយនាំយក មកធ្វើការសាកសួរ និងបំភ្លឺចំពោះករណីដែលគាត់បានលើកឡើងថា មានករណីចោរឆក់ កាលពីថ្ងៃទី០៩ ខែតុលា ឆ្នាំ២០២០ ក្រោយពីធ្វើការសាកសួរស្ត្រីរូបនេះបានសារភាពថា មិនមានករណីឆក់កើតឡើងមកលើរូបគាត់នោះទេ ដោយសារតែគាត់ ចង់បានលុយ ដើម្បីត្រឡប់ទៅប្រទេសចិនវិញ ទើបប្រឌិតរឿងនេះឡើង។
ម្យ៉ាងវិញទៀត ដោយមានការសង្ស័យថា ស្ត្រីរូបនេះប្រើប្រាស់សារធាតុញៀន មន្ត្រីជំនាញបានធ្វើតេស្តស្ត្រីជនជាតិចិនរូបនេះ ជាលទ្ធផលបានបង្ហាញថា គាត់ពិតជាបានប្រើប្រាស់សារធាតុញៀនពិតប្រាកដមែន។
សូមរម្លឹកឡើងវិញថា កាលវេលាម៉ោង១១និង០៥នាទីយប់ ថ្ងៃទី១៤ ខែតុលា ឆ្នាំ២០២០កន្លងទៅ មាននារីជនជាតិចិនម្នាក់ ដើរអូសវាលី ស្រែកយំឈរតាមផ្លូវ បង្កការភ្ញាក់ផ្អើលដល់ប្រជាពលរដ្ឋ និងក្រុមអ្នកសារព័ត៌មានចុះទៅផ្សាយជួយលួងលោមនាំមកខាងវិញ តែនាងមិនព្រម ក៏ស្រែកឡាំប៉ា នៅចំណុចរង្វង់មូលសម្ដេចសង្ឃជួនណាត ស្ថិតក្នុងសង្កាត់ចតុមុខ ខណ្ឌដូនពេញ រាជធានីភ្នំពេញ ៕