[wai id="9"]
សម្តេចក្រឡាហោម សខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅថ្ងៃទី២៥ ខែកុម្ភៈ ឆ្នាំ២០២១នេះ បានសម្រេចបណ្តេញលោក Shen Kaidong ជនជាតិចិន ដែលជានាយកសារព័ត៌មាន Angkor Today ចេញពីប្រទេសកម្ពុជា ក្រោយផ្សព្វផ្សាយបំភ្លៃការពិតថា កម្ពុជាលក់វ៉ាក់សាំងដែលជាជំនួយរបស់ចិន។
ពាណិជ្ជកម្ម
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានបដិសេធ និងថ្កោលទោសចំពោះការផ្សព្វផ្សាយដែលថា ក្រសួងបានលួចលក់វ៉ាក់សាំងកូវីដ ១៩ ស៊ីណូហ្វាមនៅមន្ទីរពេទ្យកាល់ម៉ែត និងថា ការចាក់វ៉ាក់សាំងនេះក៏មិនតម្រូវឱ្យបង់ប្រាក់ដែរ ខណៈការចាក់វ៉ាក់សាំងពីដំបូង គឺធ្វើឡើងសម្រាប់តែក្រុមមនុស្សស្ម័គ្រចិត្តតាមការប្រកាសពីក្រសួងសុខាភិបាល។
លោកស្រីបានបញ្ជាក់ កាលពីម្សិលមិញថា៖ «ខ្ញុំសុំប្រកាសច្រានចោលទាំងស្រុង ហើយក៏សូមថ្កោលទោសចំពោះជនដែលបំពុលសង្គមដែលប្រឌិតបង្កើតនូវពាក្យ និងព័ត៌មានដែលមិនពិតនេះឡើង ដោយសារយើងមិនមានការចាក់ដោយតម្រូវឱ្យមានការបង់ប្រាក់ទេ ហើយបច្ចុប្បន្ននេះក៏មិនមានវ៉ាក់សាំងណាដែលប្រកាសចាក់ដោយមានការបង់ថ្លៃដែរ ពីព្រោះវ៉ាក់សាំងយើងមានកំណត់»។
ជាមួយគ្នានេះ លោកស្រី បានស្នើឱ្យអាជ្ញាធរចាត់វិធានការទៅលើស្ថាប័នសារព័ត៌មានដែលបានផ្សាយមិនពិតពីរឿងនេះផងដែរ។
គួរបញ្ជាក់ដែរថា បច្ចុប្បន្ននេះ ជនជាតិចិនរូបនេះ ក៏ត្រូវបានហាមឃាត់មិនឱ្យចូលមកប្រទេសកម្ពុជា។ មិនតែប៉ុណ្ណោះ សារព័ត៌មាន Angkor Today ក៏ត្រូវបានក្រសួងព័ត៌មានកម្ពុជា សម្រេចដក ហូតអាជ្ញាបណ្ណផង ដែរ។
តាមប្រការ១ នៃប្រកាសនេះ បញ្ជាក់យ៉ាងដូច្នេះថា៖ «បណ្តេញចេញពីព្រះរាជាណាចក្រកម្ពុជា ចំពោះជនបរទេសឈ្មោះ Shen Kaidong ភេទប្រុស ជនជាតិចិន សញ្ជាតិចិន កើតនៅថ្ងៃទី២២ ខែធ្នូ ឆ្នាំ១៩៦៩ លិខិតឆ្លងដែនលេខ E99812704 ពាក់ព័ន្ធបទប្រព្រឹត្តនៅព្រះរាជាណាចក្រកម្ពុជា ទៅប្រទេសដើមវិញ និងហាមឃាត់ចូលព្រះរាជាណាចក្រកម្ពុជា»៕