[wai id="9"]
កាលពីពេលកន្លងទៅនេះបើយោងតាមសេចក្តីសម្រេចរបស់រាជរដ្ឋាភិបាលស្តីពីការបន្តការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅនៃខេត្តកណ្តាល ដើម្បីទប់ស្កាត់ការឆ្លងរាលដាលនៃជំងឺកូវីដ ១៩ កាលពីថ្ងៃទី ២៦ ខែមេសា បានកំណត់ភូមិសាស្ត្រដែលត្រូវបានបិទខ្ទប់ ជា «តំបន់ក្រហម» «តំបន់លឿងទុំ» និង «តំបន់លឿង»។
ពាណិជ្ជកម្ម
ប៉ុន្តែមិនទាន់បានប៉ុន្មានម៉ោងផងស្រាប់តែមានមានការចែកចាយលើបណ្តាញសង្គមយ៉ាងព្រោងព្រាត នូវផែន ទីមិនផ្លូវការមួយ ស្តីពីការបែងចែកជា «តំបន់ក្រហម» «តំបន់លឿងទុំ» និង «តំបន់លឿង» ក្នុងភូមិសាស្ត្ររាជ ធានីភ្នំពេញ។ ជុំវិញបញ្ហានេះលោក ម៉េត មាសភក្តី អ្នកនាំពាក្យសាលារាជធានីភ្នំពេញ បានប្រកាស ជូនសាធារណជនជ្រាបថា គិតត្រឹមយប់ថ្ងៃទី២៦ ខែមេសា ឆ្នាំ២០២១នេះ រដ្ឋបាលរាជធានីភ្នំពេញ មិនទាន់បានកំណត់ផែនទីស្តីពីការបែងចែកជា «តំបន់ក្រហម» «តំបន់លឿងទុំ» និង «តំបន់លឿង» នៅឡើយនោះទេ។
លោកបញ្ជាក់ថា៖ «សេចក្តីសម្រេចរបស់រាជរដ្ឋាភិបាល ដែលទើបនឹងចេញនៅថ្ងៃទី ២៦ ខែមេសានេះ នឹងមានសុពលភាពចាប់ពីម៉ោងសូន្យ ថ្ងៃទី ២៩ ខែ មេសា ឆ្នាំ ២០២១ តទៅ»។
លោក ម៉េត មាសភក្តី សំណូមពរសាធារណជនបញ្ឈប់ការចែកចាយផែនទីដែលច្នៃប្រឌិត មិនផ្លូវការទាំងឡាយជាបន្ទាន់ ហើយសម្រាប់អ្នកចែកចាយព័ត៌មានក្លែងក្លាយនេះ នឹងត្រូវចាត់ការតាមផ្លូវច្បាប់ ៕