នេះបើតាមសេចក្តីប្រកាសព័ត៌មានរបស់គ្រឹះស្ថានអង្គរ បានឲ្យដឹងថារយៈពេល ១២ខែ នៃឆ្នាំ២០១៩ ចំនួនភ្ញៀវទេសចរបរទេស និងចំណូលដែលទទួលបានពីការលក់បណ្ណចូលទស្សនារមណីយដ្ឋានអង្គរមានការធ្លាក់ចុះបើប្រៀបធៀបនឹងឆ្នាំ២០១៨។ ក្នុងនោះ ចំនួនភ្ញៀវសរុបមានជាង ២,២លាននាក់ (ធ្លាក់ចុះ ១៤,៨៦ភាគរយ) និងចំណូលសរុបជាង៩៩លានដុល្លារ (ធ្លាក់ចុះ ១៥,០៤ភាគរយ)។
របាយការណ៍ដដែលបានឲ្យុដឹងថា ភ្ញៀវទេសចរដែលទិញសំបុត្រចូលទស្សនារមណីយដ្ឋានអង្គរវត្ត បានធ្លាក់ចុះ តាំងពីខែមិថុនា ឆ្នាំ២០១៩មកម្លេះ។ ការធ្លាក់ចុះភ្ញៀវទេសចរដែលទៅទស្សនារមណីយដ្ឋានអង្គរ រហូតដល់បច្ចុប្បន្ននេះ គឺដោយសារ តែក្រុមហ៊ុនដែលលក់កញ្ចប់ ទេសចរណ៍មួយ ជាអ្នកបំផ្លាញគោលដៅទេសចរណ៍ ព្រោះថាបណ្ដាក្រុមហ៊ុនទាំងនោះយកភ្ញៀវមកក្នុងតម្លៃទាបឬមិនចំណេញតែម្ដង តែពួកគេរកស៊ីនៅតាមហាងវត្ថុអនុស្សាវរីយ៍ អាហារដ្ឋាន ឬសណ្ឋាគារជាដើមដែលលក់ក្នុងតម្លៃខ្ពស់។ នេះជាការលើកឡើងរបស់លោកថោង ខុន រដ្ឋមន្ត្រីក្រសួងទេសចរណ៍ក្នុង ពិធីបិទសិក្ខាសាលាស្ដីពីការរៀបចំផែនការមេអភិវឌ្ឍវិស័យទេសចរណ៍ខេត្តសៀមរាបកាលពីថ្ងៃទី១១ កក្កដា។ នេះបើយោងតាមការចុះផ្សាយរបស់សារព័ត៌មានថ្មីៗ កាលពីថ្ងៃទី ០១ ខែមករា ឆ្នាំ ២០២០ ។
គួរបញ្ជាក់ដែរថា យោងតាមរបាយការណ៍របស់ ស្ថាប័នផ្សព្វផ្សាយទេសចរណ៍ពិភពលោក របស់អាល្លឺម៉ង់ You Discover បានបង្ហាញពីសក្តានុពលនៃខេត្តសៀមរាប ដែលមានប្រាសាទបុរាណជាច្រើន ជាពិសេសគឺ ប្រាសាទអង្គរវត្ត ដែលជាអត្តសញ្ញាណជាតិខ្មែរ គួបផ្សំនឹងតំបន់កម្សាន្តជាច្រើនទៀត ដែលបង្កើតបានជា បរិយាកាសដ៏ទាក់ទាញសម្រាប់ភ្ញៀវទេសចរណ៍បរទេស។ តាមការព្យាករ ប្រទេសកម្ពុជា នឹងទទួលបានភ្ញៀវទេសចរអន្តរជាតិប្រមាណ ៦លាន ៦សែននាក់ នៅឆ្នាំ ២០២០ និងប្រមាណ ១៥លាននាក់ នៅឆ្នាំ ២០៣០ ដោយរំពឹងរកចំណូលបានប្រមាណ ១០ពាន់លានដុល្លារអាមេរិក និងបង្កើតឱកាសការងារប្រមាណ ២លានកន្លែង៕