[wai id="8"]
[wai id="7"]
ធនាគារអភិវឌ្ឍន៍អាស៊ី (ADB) បានអនុម័តហិរញ្ញប្បទាន ជាង២៩លានដុល្លារអាមេរិក ដើម្បីគាំទ្ររាជរដ្ឋាភិបាលកម្ពុជា ធ្វើឱ្យប្រសើរឡើង នូវការផ្តល់សេវាតាមរយៈ កំណែទម្រង់សំខាន់ៗ ក្នុងការគ្រប់គ្រងហិរញ្ញវត្ថុសាធារណៈ និងវិមជ្ឈការ ជាពិសេសនៅតាមតំបន់ជនបទ ដែលភាគច្រើនពលរដ្ឋក្រីក្ររស់នៅ។
ធនាគារអភិវឌ្ឍន៍អាស៊ី បានបញ្ជាក់ថា ក្នុងចំណោមកម្ចីទាំងជិត៣០លានដុល្លារនេះ មាន ២០លានដុល្លារ សម្រាប់គាំទ្រដល់វិធីសាស្ត្រ ដើម្បីពង្រឹងផែនការ គោលនយោបាយ និងការគ្រប់គ្រងសារពើពន្ធនៃរដ្ឋបាលមូលដ្ឋាន ក៏ដូចជារដ្ឋបាលសាធារណៈ ក្នុងការអភិវឌ្ឍផ្នែកសេវា និងការគ្រប់គ្រងវិស័យហិរញ្ញវត្ថុសាធារណៈដែលបានធ្វើវិមជ្ឈការរួម។
ពាណិជ្ជកម្ម
រីឯ កម្ចី៩,៣៥លានដុល្លារទៀតនោះ គឺសម្រាប់អនុវត្តគម្រោង កសាងសាលារដ្ឋបាលមូលដ្ឋានជាតិ ដែលជាមជ្ឈមណ្ឌលបណ្តុះបណ្តាល សម្រាប់មន្ត្រីរាជរដ្ឋាភិបាលក្នុងតំបន់។ បើតាមធនាគារអភិវឌ្ឍន៍អាស៊ី ការអនុវត្តគម្រោងនេះ រាជរដ្ឋាភិបាលកម្ពុជា ក៏បានផ្តល់ហិរញ្ញប្បទានចំនួន ១,៧លានដុល្លារ ផងដែរ។
អ្នកជំនាញជាន់ខ្ពស់ផ្នែកគ្រប់គ្រងវិស័យសាធារណៈរបស់ធនាគារអភិវឌ្ឍន៍អាស៊ី លោកស្រី Jhelum Thomas បានលើកឡើងថា គម្រោងនេះ មានគោលបំណងជួយដល់រដ្ឋបាលមូលដ្ឋាននៅទូទាំងប្រទេសកម្ពុជា ក្នុងការផ្តល់នូវសេវាសាធារណៈមូលដ្ឋានប្រកបដោយនិរន្តរភាព និងប្រសិទ្ធភាព ហើយក៏ជាការបង្រួមគម្លាតតំបន់ជនបទនិងទីប្រជុំជន។ លោកស្រី Jhelum Thomas បន្តថា «គម្រោងនេះចាំបាច់ណាស់ ខណៈដែលជំងឺរាតត្បាតកូវីដ១៩ ធ្វើឱ្យប្រជាពលរដ្ឋមួយចំនួនបានផ្លាស់ទីពីទីក្រុងទៅជនបទ។ ប្រការនេះនឹងនាំដល់សម្ពាធបន្ថែមដល់រដ្ឋបាលមូលដ្ឋានក្នុងការផ្តល់ជំនួយសង្គម និងសេវាកម្មចាំបាច់ ដូចជា ផ្លូវថ្នល់ ការផ្គត់ផ្គង់ទឹកនិងអនាម័យ ដើម្បីគាំទ្រដល់ការរីកចម្រើនប្រកបដោយបរិយាប័ន្ននិងសមធម៌»៕