សណ្ឋាគារផ្កាយ៥ដែលមានវ័យចំណាស់មួយ នៅរាជធានីភ្នំពេញ ដែលជាអតីតសណ្ឋាគារ Inter-Continental Hotel ក្រោយមកប្តូរឈ្មោះទៅជា The Great Duke Phnom Penh នៅដើមឆ្នាំ២០១៨ នៅពេលនេះ បានប្រកាសបិទទ្វារឈប់ដំណើរការចាប់ពីថ្ងៃទី៣១ ខែធ្នូ ឆ្នាំ២០១៩ កាលពីពេលកន្លងទៅ ។
សណ្ឋាការដ៏ល្បីល្បាញមួយនេះ ចាប់បើកដំណើរការអាជីវកម្មតាំងពីឆ្នាំ ១៩៩៦ ក្នុងនាមជាសណ្ឋាគារ Inter-Continental មុនពេលប្តូរឈ្មោះមកជា The Greate Duke Hotel កាលដើមឆ្នាំ ២០១៨ ដោយមានក្រុមហ៊ុន Regency Company Limited ជាម្ចាស់កម្មសិទ្ធិ។
សណ្ឋាគារនេះបានដើរតួនាទីយ៉ាងសំខាន់ក្នុងការទទួលមេដឹកនាំប្រទេសជាច្រើន ដែលធ្វើដំណើរមកកម្ពុជា ដើម្បីចូលរួមកិច្ចប្រជុំដែលកម្ពុជាធ្វើជាម្ចាស់ផ្ទះនៃកិច្ចប្រជុំអាស៊ានលើកដំបូងកាលពីឆ្នាំ ២០០២។
យ៉ាងណាមិញនៅក្នុង សេចក្តីជូនដំណឹងបានលើកឡើងថា «ជូនចំពោះបុគ្គលិកទាំងអស់។ អាស្រ័យដោយមូលហេតុសេដ្ឋកិច្ច យើងមានការសោកស្តាយ សូមជម្រាបជូនដំណឹងថា សណ្ឋាគារនឹង ត្រូវបិទដំណើរការនៅថ្ងៃទី៣១ ខែធ្នូ ឆ្នាំ២០១៩។ ចាប់ពីថ្ងៃជូនដំណឹងនេះ តទៅបុគ្គលិកទាំងអស់ ត្រូវបានស្នើឲ្យសម្រាកមិនបាច់មកធ្វើការទេ។ ម្យ៉ាងវិញទៀត សណ្ឋាគារបានចាត់តាំងការិយាល័យមេធាវី អេចប៊ីអេស (HBS) ឲ្យទទួលដោះស្រាយនូវដំណើរការនៃការ បិទសណ្ឋាគារនេះ រួមទាំងការគិតគូរដោះស្រាយ ពីអត្ថប្រយោជន៍របស់បុគ្គលិកទាំងអស់ ទៅតាមផ្លូវច្បាប់ជាធរមាន»។
គួររម្លឹកដែរថា សណ្ឋាគារ ឌឹ ហ្គ្រេតឌុក ធ្លាប់មានបាតុភាពបុគ្គលចេញតវ៉ារឿងបើកប្រាក់ខែយឺតយ៉ាវ ដោយបុគ្គលិកបានធ្វើពហិការមិនធ្វើការនិងកាន់បដាតវ៉ានៅមុខសណ្ឋាគារនេះ។ ក្រោយមកទៀតដោយមានការសម្របសម្រួលបុគ្គលិកក៏ព្រមចូលធ្វើការវិញ ជាមួយនឹងលក្ខខណ្ឌដែលអ្នកគ្រប់គ្រងសណ្ឋាគារបានផ្ដល់ជូន ។ តែលើកនេះសណ្ឋាគារបានប្រកាសបិទដំណើរការនិងបានប្រកាសពីមូលហេតុនេះការបិទទ្វារដោយសារតែបញ្ហាសេដ្ឋកិច្ច។
ទិន្នន័យពីក្រសួងទេសចរណ៍បានឲ្យដឹងថា គិតត្រឹមខែឧសភា ឆ្នាំ ២០១៩ នៅកម្ពុជាមានសណ្ឋាគារកំពុងដំណើរការសរុប ១៥២ ដែលមានបន្ទប់ស្នាក់នៅសរុប ១៧ ៤៥០។ សណ្ឋាគារលំដាប់ផ្កាយ ៥ មានចំនួន ៣៦ លំដាប់ផ្កាយ ៤ មាន ៤១ លំដាប់ផ្កាយ ៣ មាន ៣៣ លំដាប់ផ្កាយ ២ មានចំនួន ១៩ និងលំដាប់ផ្កាយ ១ មានចំនួន ២១។ ដោយឡែកក្នុងរាជធានីភ្នំពេញ មានសណ្ឋាគារផ្កាយ ៥ ចំនួន ៧ ផ្កាយ ៤ ចំនួន ៨ ផ្កាយ ៣ ចំនួន ១៣ ផ្កាយ ២ ចំនួន ៧ និងផ្កាយ ១ ចំនួន ៥៕