កាលពីពេលថ្មីៗកន្លងទៅនេះ បន្ទាប់ពីរដ្ឋបាលខេត្តកំពង់ស្ពឺបានរៀបចំពិធីសម្ពោធដាក់ឱ្យប្រើប្រាស់ជាផ្លូវការនូវស្ពានអាកាសថ្មើរជើងដែលឈ្មោះថា «តេជោសន្តិភាព» ដំបូងគេបង្អស់បន្ទាប់ពីរាជធានីភ្នំពេញ ក្នុងតម្លៃសាងសង់ ៣៤ម៉ឺនដុល្លារអាមេរិក បានធ្វើឲ្យមានផ្ទុះការរិះគន់ពីសំណាក់មហាជនមួយចំនួន ថាមានតម្លៃថ្លៃហួសហេតុ ជាដើម ។
ជុំវិញបញ្ហានេះ អភិបាលខេត្តកំពង់ស្ពឺលោក វី សំណាង បានសរសេររៀបរាប់ថា៖ "គោរពជម្រាបសួរពុកម៉ែបងប្អូន! កាលពីថ្ងៃទី ២៩ ខែធ្នូឆ្នាំ ២០១៩ នេះរដ្ឋបាលខេត្ត បានសម្ពោធដាក់ឲ្យប្រើប្រាស់នូវស្ពានអាកាសដើរឆ្លងថ្នល់( ស្ពានតេជោសន្តិភាពកំពង់ស្ពឺ ) ក្រោមជំនួយសប្បុរសធម៌ របស់លោកជំទាវកិត្តិ បណ្ឌិត សៀង ចាន់ហេង អគ្គនាយិកាក្រុមហ៊ុនហេងអភិវឌ្ឍន៍ ដោយចំណាយណាយទឹកប្រាក់អស់ចំនួន 318.523,47$ ( តម្លៃស្ពាន 285.390,83$ បូករួមទាំងសាងសង់ចិញ្ចើមផ្លូវសងខាង 33.132,64$ )។
សមិទ្ធផលនេះជាគម្រោងថ្មីមួយទៀត ដែលជួយឧបត្ថម្ភដោយលោកជំទាវកិត្តិបណ្ឌិតសៀងចាន់ហេងទាំងស្រុង។ ប៉ុន្តែខ្ញុំឃើញបងប្អូនដែលមានចិត្តចង្អៀតចង្អល់មួយមួយចំនួនតូច ចូលមកខំមិនក្នុងន័យធ្វើឱ្យបាត់សទ្ធាជ្រះថ្លាពីសំណាក់ម្ចាស់ទាន ដោយបញ្ចេញនូវគំនិតអគតិក្នុងន័យបន្តុះបង្អាប់ ឬ បន្ទុច បង្អាក់នៅក្នុងការចូលរួមរួមអភិវឌ្ឍន៍ពីសំណាក់វិស័យឯកជន ដូចជាប្រើពាក្យថា *ស្ពានយួន យួន ម៉េចណាមិនដឹង?។
ស្ពានធ្វើអស់លុយច្រើនមិនសមនឹងតម្លៃ!ឡើងគម្រោងកិបកេងលុយរដ្ឋ! ប្រជាពលរដ្ឋត្រូវចំណាយលុយច្រើន ក្នុងការបង់ពន្ធ! ដើរឆ្លងស្ពានគិតលុយជាដើម។ ល ។ ខ្ញុំសូមបញ្ជាក់ជូនថានេះគឺជាលុយដែលជាញើសឈាមរបស់លោកជំទាវកិត្តិបណ្ឌិតសៀងចាន់ហេងពិតប្រាកដ! ដែលលោកមានការពេញចិត្តជាមួយនឹងការដឹកនាំរបស់រាជរដ្ឋាភិបាលជាពិសេសក្រោមការដឹកនាំរបស់សម្ដេចតេតេជោនាយករដ្ឋមន្ត្រី។
មិនតែប៉ុណ្ណោះលោកជំទាវ មានការស្រឡាញ់ពេញចិត្តជាមួយនឹងបងប្អូនប្រជាពលរដ្ឋអ្នកខេត្តកំពង់ស្ពឺ ដែលជាប្រជាពលរដ្ឋល្អ យល់ដឹងអំពីតម្លៃនៃសន្តិភាព!!!!! ពីព្រោះពួកគាត់បានចូលរួមបោះឆ្នោតគាំទ្រគណបក្សប្រជាជនកម្ពុជាឈ្នះភ្លូកទឹកភ្លូកដី ។
សូមគោរពបញ្ជាក់ជូនថាលោកជំទាវកិត្តិ បណ្ឌិតសៀង ចាន់ហេង លោកមិនត្រឹមតែចូលរួមនៅក្នុងការកសាងវិស័យ ពុទ្ធចក្រទេទាំងវិស័យ អាណាចក្រទាំងពុទ្ធចក្រគឺគាត់បានចូលរួមកសាងយ៉ាងច្រើននៅក្នុងខេត្តកំពង់ស្ពឺរបស់យើងខ្ញុំ។
ក្នុងខណៈនេះ ដែរ ខ្ញុំសូម អំពាវនាវ ពុកម៉ែបងប្អូនមេត្តាចូលរួមថែរក្សានូវទ្រព្យសម្បត្តិដែលយើងអាចនិយាយបានថាជាប្រវត្តិសាស្ត្ររបស់ប្រទេសយើងដែលកាលពីសម័យមុនៗ គេតែងតែយកកំពង់ស្ពឺរបស់យើងធ្វើជាសមរភូមិប្រយុទ្ធដោយចុងអាវុធ។
បច្ចុប្បន្ន កំពង់ស្ពឺ ជាខេត្តដែលពោរពេញទៅដោយសក្តានុពលសម្រាប់ការអភិវឌ្ឍលើគ្រប់វិស័យដែលយើងអាចមើលឃើញដោយភ្នែក! នៅពេលដែលយើងមើលដោយបើកបេះដូង។បញ្ជាក់ជូនដែរថាស្ពាននេះនៅពេលដែលបងប្អូនដើរឆ្លងកាត់គឺមិនត្រូវបានគិតលុយឡើយ។
ការកសាងនេះគឺមានបំណងចង់ឱ្យអ្នកកំពង់ស្ពឺដែលគាត់ត្រូវដើរឆ្លងថ្នល់មិនឱ្យមានជួបគ្រោះថ្នាក់ចរាចរណ៍ជាយថាហេតុតែប៉ុណ្ណោះ។
សូមបញ្ជាក់ថាស្ពានអាកាសថ្មើរជើងនេះបានសាងសង់រយះពេល ៦ខែជាង ដែលមានកម្ពស់ ៥.៧ ម៉ែត្រ បណ្តោយ ៣៩.៣៩ ម៉ែត្រ ទទឹង ៣.៨០ ម៉ែត្រ សរុបអស់ថវិកាប្រមាណ ៣៤ម៉ឺនដុល្លា ក្រោមជំនួយឧបត្ថម្ភរបស់លោកស្រី សៀង ចាន់ហេង អគ្គនាយិកាក្រុមហ៊ុនហេងអភិវឌ្ឍន៍ ។
ស្ពានអាកាសថ្មើរជើងនេះនឹងចូលរួមចំណែកយ៉ាងធំធេង ក្នុងការលើកកម្ពស់សោភ័ណភាពមុខមាត់ខេត្តកំពង់ស្ពឺផងដែរ មិនតែប៉ុណ្ណោះក៏បានកាត់បន្ថយការកកស្ទះចរាចរណ៍ផងដែរ ។
Home សេដ្ឋកិច្ច អភិបាលខេត្តកំពង់ស្ពឺ ៖ … ទាក់ទងរឿងស្ពានអាកាសថ្មើរជើងតម្លៃជិត ៤០ម៉ឺនដុល្លារ ត្រូវបានទម្លាយ