[wai id="6"]
កាលពីពេលថ្មីៗនេះ គណៈរដ្ឋមន្ត្រីថៃ បានអនុម័តលើសំណើឲ្យមានការស្តារនីតិសម្បទាក្រុមហ៊ុនអាកាសចរណ៍ថៃអន្តរជាតិ (Thai Airways International: THAI) តាមនីតិវិធីតុលាការដាក់ក្ស័យធន ។ ការប្រកាសក្ស័យធននេះអាចបណ្តាលឲ្យ Thai Airways បាត់បង់ឋានៈជា «សហគ្រាសរដ្ឋ»។
គណៈកម្មាធិការគោលនយោបាយសហគ្រាសរដ្ឋដឹកនាំដោយលោកនាយករដ្ឋមន្ត្រី Prayut Chan-o-cha បានសម្រេចកាលពីថ្ងៃអង្គារដោយបង្ខំឲ្យក្រុមហ៊ុនអាកាសចរណ៍ជាតិដាក់សំណើប្រកាសក្ស័យធន និងស្តារនីតិសម្បទាឡើងវិញក្រោមនីតិវិធីតាមផ្លូវតុលាការ។
នាយករដ្ឋមន្ត្រីថៃលោក ប្រាយុទ្ធ ចាន់អូចា បានបញ្ជាក់ថាបន្ទាប់ពីគណៈរដ្ឋមន្ត្រី បានសម្រេចចិត្តបោះបង់ចោល ការផ្តល់ ហិរញ្ញវត្ថុដល់ក្រុមហ៊ុនអាកាសចរណ៍ Thai Airways International Plc ព្រោះត្រូវតែសន្សំប្រាក់ សម្រាប់គម្រោង ផ្តល់ជំនួយដែលចាំបាច់ដើម្បីកាត់បន្ថយវិបត្តិCovid-19 និងពង្រឹងសេដ្ឋកិច្ចឡើងវិញ។ លោកបានលើកឡើងដូច្នេះថា៖«ថ្ងៃនេះខ្ញុំត្រូវធ្វើការសម្រេចចិត្តដ៏ពិបាកទាក់ទងនឹង Thai Airways ប៉ុន្តែវាគឺជារឿងមួយដែល ខ្ញុំដឹងថាជាផលប្រយោជន៍ល្អបំផុតសម្រាប់សាធារណជននិងប្រទេសរបស់យើង »។
ពាណិជ្ជកម្ម
រដ្ឋាភិបាលបានដាក់ចេញនូវជម្រើសបី សម្រាប់ស្ដារឡើងវិញនៃ Thai Airways ដោយទី១.រកប្រាក់បន្ថែមដើម្បីឱ្យក្រុមហ៊ុន អាកាសចរណ៍នៅតែបន្តប្រតិបត្តិការ ទី២.អនុញ្ញាតឱ្យក្រុមហ៊ុនក្ស័យធន និងទី៣.ទុកឱ្យតុលាការក្ស័យធនជាអ្នកស្ដារក្រុមហ៊ុន ឡើងវិញ ដោយលោកនាយករដ្ឋមន្ត្រីមានប្រសាសន៍ថា “ យើងបានសម្រេចចិត្តលើជម្រើសទី ៣”។ យោងតាមក្រសួងដឹកជញ្ជូនពាក្យបណ្តឹងក្ស័យធនដើម្បីធ្វើឱ្យមានការស្តារឡើងវិញនឹងត្រូវដាក់ទៅតុលាការទាំងនៅក្នុងប្រទេសថៃ និងសហរដ្ឋអាមេរិក ដោយសារប្រហែល ៣៥% នៃម្ចាស់បំណុលរបស់ក្រុមហ៊ុនអាកាសចរណ៍នេះមានមូលដ្ឋាន នៅសហរដ្ឋអាមេរិក។
ជាមួយគ្នានេះដែរការស្តារឡើងវិញដោយតុលាការនឹងពាក់ព័ន្ធទៅលើការកាត់បន្ថយភាគហ៊ុនភាគច្រើនរបស់ក្រសួងហិរញ្ញវត្ថុនៅក្នុងក្រុមហ៊ុនThai Airways និងធ្វើឱ្យក្រុមហ៊ុនអាកាសចរណ៍បាត់បង់ភាពជាសហគ្រាសរបស់រដ្ឋ។
គួរបញ្ជាក់ផងដែរថា បើតាមការអះអាងរបស់លោក អ៊ុតតាម៉ា សុវណ្ណាយ៉ាណា ដែលជារដ្ឋមន្ត្រីក្រសួងហិរញ្ញវត្ថុថៃ បានថ្លែងថា ការិយាល័យគោលនយោបាយសហគ្រាសរដ្ឋ នឹងដាក់ចេញផែនូវនការ កាត់បន្ថយចំណែកភាគហ៊ុនរបស់ក្រសួងហិរញ្ញវត្ថុនៅក្នុងក្រុមហ៊ុនអាកាសចរណ៍ Thai Airways ពី ៥១,០៣ ភាគរយ មកនៅក្រោម ៥០ ភាគរយវិញ ដែលនឹងបញ្ចប់ភាពជាសហគ្រាសរដ្ឋរបស់ក្រុមហ៊ុននេះផងដែរ៕
[wai id="5"]