[wai id="6"]
អាកាសយានដ្ឋានអន្តរជាតិភ្នំពេញថ្មី នៅក្នុងទឹកដីខេត្តកណ្តាលត្រូវបានរចនាឡើងលំដាប់ថ្នាក់ 4F នឹងក្លាយជាអាកាសយានដ្ឋានធំជាងគេលំដាប់ទី៩ នៅលើពិភពលោកបន្ទាប់ពីអាកាសយានដ្ឋាន Chicago O’Hare និងនាំមុខអាកាសយានដ្ឋានអន្តរជាតិបេកាំងរបស់ប្រទេសចិន Beijing Capital International ។
បើតាមការគូសបញ្ជាក់ពីលោកឧកញ៉ា ពុង ឃាវសែ អគ្គនាយកក្រុមហ៊ុនសាជីវកម្មវិនិយោគក្រៅប្រទេសកម្ពុជា (OCIC) កាលពីថ្ងៃទី៥ ខែធ្នូ កន្លងទៅ ព្រលានយន្តហោះអន្តរជាតិភ្នំពេញថ្មីនេះ គឺកំពុងស្ថិតនៅក្នុងការសាងសង់ ស្ថិតនៅក្រុងតាខ្មៅ និងស្រុកកណ្តាលស្ទឹងខេត្តកណ្តាល ហើយអាចប៉ះតំបន់មួយចំនួនក្នុងស្រុកបាទីខេត្តតាកែវ។ បើតាមលោក ពុង ឃាវសែ គម្រោងសាងសង់ព្រលានយន្តហោះអន្តរជាតិថ្មីនេះ អាចនឹងរួចរាល់នៅត្រឹមឆ្នាំ២០២៣ខាងមុខនេះ។ នោះប្រសិនបើពុំសូវមានឧបសគ្គប៉ុន្មានពីប្រជាជនជាម្ចាស់ដីដែលក្រុមហ៊ុនកំពុងប្រមូលទិញ។
បើតាមអ្នកជំនាញផ្នែកអចលនទ្រព្យបានលើកឡើងថាដីនៅជិតទីតាំងក្បែរ ព្រលានយន្តហោះថ្មីនឹងផ្តល់ជា ប្រយោជន៍ច្រើន ដល់សេដ្ឋកិច្ចក្នុងតំបន់។
ពាណិជ្ជកម្ម
ជាមួយគ្នានោះដែរបើតាមអ្នកជំនាញអចលនទ្រព្យបានលើកឡើងថា ជំហាននៃការអភិវឌ្ឍន៍សម្រាប់តំបន់ដែលនៅជុំវិញតំបន់គម្រោងព្រលានយន្តហោះថ្មីគឺរំពឹងថានឹងអាចដូចជាតំបន់សែនសុខ និងពោធិ៍សែនជ័យដែលមានភាពរីកចម្រើនគួរឲ្យកត់សម្គាល់ដោយសារតែស្ថិតនៅជិតព្រលានយន្តហោះ អន្តរជាតិភ្នំពេញ។
អ្នកជំនាញបានបន្ថែមថា “ពាណិជ្ជកម្ម និងទេសចរណ៍នឹងទទួលបានផលប្រយោជន៍កាន់តែច្រើនពីគម្រោង ព្រលានយន្តហោះថ្មី។ ព្រលានយន្តហោះមានសារៈសំខាន់ណាស់ចំពោះការដឹកជញ្ជូននៅក្នុងប្រទេស។ ព្រលានយន្តហោះថ្មី នឹងជួយសម្រួលដល់ការនាំចេញនាំចូលទំនិញ ហើយនាំយកភ្ញៀវទេស ចរបន្ថែមទៀតមក កម្ពុជា។”
គួរបញ្ជាក់ដែរថា បើតាមមន្ត្រីជាន់ខ្ពស់រដ្ឋលេខាធិការដ្ឋានអាកាសចរស៉ីវិល នៅថ្ងៃទី១៦ ខែមេសា ឆ្នាំ២០២០ បានលាតត្រដាង ពីគម្រោងវិនិយោគ នៃការសាងសង់អាកាសយានដ្ឋានថ្មីៗ និងស្តារឡើងវិញ យ៉ាងតិចចំនួន៧ ដែលប្រើប្រាស់ទុនវិនិយោគ រាប់ពាន់លានដុល្លារ។
ថ្លែងក្នុងសន្និសីទស្ដីពី «វឌ្ឍនភាព ទិសដៅការងារបន្ដ របស់រដ្ឋលេខាធិការដ្ឋានអាកាសចរស៉ីវិល» ដែលរៀបចំឡើងដោយ អង្គភាព អ្នកនាំពាក្យរាជរដ្ឋាភិបាល នៅព្រឹកថ្ងៃទី១៦ ខែមេសា ឆ្នាំ២០២០នេះ លោក ស៊ីន ចាន់សិរីវុត្ថា អគ្គនាយករង បច្ចេកទេស និងជាអ្នកនាំពាក្យអាកាសចរស៊ីវិល បានលើកឡើងថា គម្រោងសាងសង់ព្រលានយន្តហោះថ្មីទាំង៧នេះ ដូចជាព្រលានយន្តហោះភ្នំពេញថ្មី, ព្រលានយន្តហោះខេត្តសៀមរាបថ្មី, ព្រលានយន្តហោះតារាសាគរកោះកុង, អាកាសយានដ្ឋានកោះកុង, ព្រលានយន្តប៉ោយប៉ែត, ព្រលានយន្តហោះខេត្តមណ្ឌលគិរី និងព្រលានយន្តហោះខេត្តបាត់ដំបង។
[wai id="5"]
