[wai id="6"]
លោក ស៊ីន ចាន់សិរីវុត្ថា អគ្គនាយករងបច្ចេកទេស និងជាអ្នកនាំពាក្យរដ្ឋលេខាធិការដ្ឋាន អាកាសចរណ៍ស៊ីវិល បានថ្លែងថា ការសាងសង់អាកាសយានដ្ឋាន អន្តរជាតិភ្នំពេញថ្មី នៅលើទឹកដីខេត្តកណ្តាល និងតាកែវ សម្រេចបានជាង ៣០% ហើយ ប៉ុន្តែការសាងសង់នៅតែបន្តដំណើរការ បើទោះបីមានភាពយឺតយ៉ាវាបន្តិចបន្តួច ដោយសារការរីករាលដាល ជាសកលនៃកូវីដ១៩ នៅលើពិភពលោក ក៏ដូចជាកម្ពុជាក៏ដោយ ។
ក្នុងសន្និសីទសារព័ត៌មាន ស្ដីពី «វឌ្ឍនភាព និងទិសដៅការងារបន្ដរបស់ រដ្ឋលេខាធិការដ្ឋានអាកាសចរស៊ីវិល» នៅថ្ងៃទី១៦ មេសា កន្លងទៅ លោក ស៊ីន ចាន់សិរីវុត្ថា បានបញ្ជាក់ថា «ការអភិវឌ្ឍន៍អាកាសយានដ្ឋានភ្នំពេញថ្មី នៅតែដំណើរការទេ ប៉ុន្ដែមានផ្ដល់ប៉ះពាល់ខ្លះដែរ ពីកូវីដ ដោយសារតែអ្នកជំនាញការចិនមួយចំនួន ក្នុងនោះភាគច្រើនជាក្រុមហ៊ុនចិន ចឹងដោយសារអ្នកជំនាញមួយចំនួនគាត់ទៅស្រុក ហើយពិបាកមកវិញ ចឹងមានការយឺតយ៉ាវ ប៉ុន្ដែដំណើរការនៅតែដំណើរ ការធម្មតា ប៉ុន្ដែយឺតជាងមុនមានជំងឺកូវីដ ប៉ុន្ដែនៅបន្ដរហូត ចឹងភ្នំពេញហ្នឹងដំណើរការបានប្រហែលជាង ៣០% ហើយ»។
ជាមួយគ្នានោះដែរ លោកឧកញ៉ាពុង ឃាវសែ បានសាងស់សំណង់ដ៏ធំជាប្រវត្តិសាស្ត្រមួយគឺ អាកាសយានដ្ឋានអន្ត រជាតិភ្នំពេញថ្មី នៅក្នុងទឹកដីខេត្តកណ្តាលត្រូវបានរចនាឡើងលំដាប់ថ្នាក់ 4F នឹងក្លាយជាអាកាសយានដ្ឋានធំជាង គេលំដាប់ទី៩ នៅលើពិភពលោកបន្ទាប់ពីអាកាសយានដ្ឋាន Chicago O’Hare និងនាំមុខអាកាសយានដ្ឋាន អន្តរជាតិបេកាំង របស់ប្រទេសចិន Beijing Capital International ដែលឧកញ៉ាពុង ឃាវសែបានពោលថា ការសាងសង់ ព្រលានយន្ដហោះនេះ ជាឆាកជីវិតចុងក្រោយរបស់លោក “ឥឡូវនេះខ្ញុំមានអាយុ៧១ឆ្នាំហើយ ទម្រាំធ្វើព្រលាន នេះរូចខ្ញុំមានអាយុ៨៧ឆ្នាំឯណោះ មិនគួរទទួលយកគម្រោងនេះមកធ្វើទេ តែ ខ្ញុំនឹងប្រើឆាកជីវិត ចុងក្រោយរបស់ខ្ញុំ មកសង់ព្រលានយន្តហោះអន្តរជាតិថ្មី នៅស្រុកស្អាងខេត្តកណ្តាល ធំជាងគេនៅកម្ពុជា ឲ្យបានដាច់ខាត”។
ពាណិជ្ជកម្ម
គម្រោងអាកាសយានដ្ឋានអន្តរជាតិភ្នំពេញថ្មីនេះ គឺចេញប្លង់សាងសង់ដោយក្រុមហ៊ុន Foster & Partners ដែលជាក្រុមហ៊ុនល្បីល្បាញមួយ នៅលើពិភពលោក។ដោយយោងតាម អ្នកអភិវឌ្ឍន៍អាកាសយានដ្ឋានបាន ឱ្យដឹងថាក្រុមហ៊ុន Foster & Partners ត្រូវបានជ្រើសរើសដើម្បីរៀបចំប្លង់មេនៃអាកាសយានដ្ឋានអន្តរជាតិ ភ្នំពេញថ្មីដែលមានទឹកប្រាក់ ១,៥ ពាន់លានដុល្លារស្ថិតនៅក្នុងខេត្តកណ្តាលនិងខេត្តតាកែវ។ ព្រលានយន្តហោះភ្នំពេញថ្មី គឺជាគម្រោងអភិវឌ្ឍន៍ដ៏ធំមួយរបស់កម្ពុជាដែលនឹងត្រូវសាងសង់នៅលើផ្ទៃដីទំហំ ២.៦០០ហិកតា និងជាការវិនិយោគរបស់ក្រុមហ៊ុនសាជីវកម្មវិនិយោគក្រៅប្រទេសកម្ពុជា (OCIC) ដោយដំណាក់កាលទីមួយ នឹងត្រូវបញ្ចប់ការសាងសង់ក្នុងឆ្នាំ ២០២៣។
គួររំលឹកថា គម្រោងព្រលានយន្តហោះភ្នំពេញថ្មីនេះ ត្រូវបានប្រកាសឡើង ក្នុងដំណើរទេស្សនកិច្ច របស់លោកនាយករដ្ឋមន្ត្រីចិន លី ខឺឈាង មកកម្ពុជា កាលពីខែមករា ឆ្នាំ២០១៨។ នាយករដ្ឋមន្ត្រីនៃកម្ពុជា សម្តេចតេជោ ហ៊ុន សែន និងលោកនាយករដ្ឋមន្ត្រីចិន ក៏បានអញ្ជើញជាអធិបតីភាព ក្នុងពិធីចុះហត្ថលេខាគម្រោងវិនិយោគ រវាងក្រុមហ៊ុន OCIC អ្នកឧកញ៉ា ពុង ឃាវសែ និងក្រុមហ៊ុនចិនផងដែរ។
ព្រលានយន្តហោះថ្មីនេះ ត្រូវបានរាជរដ្ឋាភិបាលបញ្ជាក់ថា នឹងសាងសង់លើផ្ទៃដីទំហំប្រមាណ២,៦០០ហិកតា ដែលជាដីស្ថិតនៅក្នុងក្រុងតាខ្មៅ និងស្រុកកណ្តាលស្ទឹង ខេត្តកណ្តាល ហើយអាចប៉ះតំបន់មួយចំនួន ក្នុងស្រុកបាទី ខេត្តតាកែវ។
ដើម្បីសាងសង់ព្រលានយន្តហោះថ្មីនេះ រាជរដ្ឋាភិបាល និងក្រុមហ៊ុន OCIC របស់អ្នកឧកញ៉ា ពុង ឃាវសែ ត្រូវបង្កើតក្រុមហ៊ុនមួយ ដែលមានឈ្មោះថា «ក្រុមហ៊ុន ខេមបូឌា អ៊ែរផត អ៉ិនវេសមិន ឬ Cambodia Airport Investment» ដែលរាជរដ្ឋាភិបាល កាន់កាប់ភាគហ៊ុន១០ភាគរយ។
ដោយឡែក ក្រុមហ៊ុនរបស់អ្នកឧកញ៉ា ពុង ឃាវសែ កាន់កាប់ភាគហ៊ុន៩០ភាគរយ ដោយវិនិយោគទឹកប្រាក់ចំនួន ១,៥០០លានដុល្លារអាមេរិក ក្នុងនោះ ទឹកប្រាក់១,១០០លានដុល្លារ ជាកម្ចីពីធនាគារបរទេស និង២៨០លានដុល្លារ ជារបស់ក្រុមហ៊ុន OCIC និង២៨០លានដុល្លារទៀត ជាដើមទុនចុះបញ្ជី៕
[wai id="5"]